港股大時代起，股民倒曬全副身家入股市，今天就一地倒瀉籮蟹。雖然股市有輕微復蘇跡象，但好多散戶已經嚇怕，有餘錢大家或者想做人民幣定存，政府7月底推出的第五批iBond，全城肯定抽爆佢。
定息產品幾受關注？《蘋果動新聞》係一個指標。昨日《港銀人幣存息最高3.35釐》點擊率高達18,000，財經版（未計專欄）中排行第三。而4月起這類新聞題材，有超過1萬人㩒已經偷笑。那些年，炒一日港交所（388）賺10%，存365日人幣年息都係得3釐，緊係睇股市新聞好過。
不過，當手上股票深潛緊三四成、無賺無蝕已經還得神落時，人幣定存忽然變得好吸引。但係咁講，人幣定存年利率較年初4.5釐大幅回落；內地經濟轉差，滙率隨時會屙返落去，相信大部份有慧眼嘅投資者，都會疊埋心水，抽返個冇乜風險、用港元計價嘅iBond好過。
iBond過去幾年回報率冇死，頭三批閒閒哋年息4釐，而且毋須承受滙率風險，如果咁啱撞正通縮年代，最少都有1釐回報，比銀行港元定存息率仲高，參考下滙豐銀行，一年都係得0.15釐。
不過最重要嘅係，唔想玩長線的投資者，iBond掛牌日即沽，歷年總可以收返啲利是錢。上年更加有機構投資者入場，喺105元位置掃貨，散戶一手賺515元，兩手就1,030元。雖然唔夠澳門今年派9,000元多，但政府總算係派錢而唔係派膠，當然要袋住先。
記者：周家誠
from:
http://hk.apple.nextmedia ... 150715/19219935
