時代唔同，以前嘅汽車可以十幾年都唔轉款，但近代汽車大多4-6年就轉新款，唔轉款只會被人話阻住地球轉，更甚係反影出車廠未搞得掂入替車。不過凡事都有例外，而Volvo XC90就係萬中無一嘅例外！初代自2002年推出至去年底先轉款，共12年光景，肯定係近年最長青車款！
第2代XC90改變之大可以話驚天動地，內外都睇得出車廠事隔12年先出新款係想精益求精，絕非技窮！而代理先安排測試最頂級XC90 T6版本，實試後更覺新一代XC90作為車廠旗艦，實力足以挑戰德國強豪。
Volvo XC90 T6 AWD Spec.
新XC90車身比上代大咗一個碼，成為巨形7人SUV，接近Audi Q7水平。 引擎：1,969c.c.直四twin charger
馬力：320hp/5,700rpm
扭力：40.8kgm/2,200-5,400rpm
傳動：8前速自動、附+/-模式
車身：4,950 X 2,008 X 1,775（mm）
車重：1,940kg
耗油：7.7L/100km
車價：$778,800起
查詢：Volvo Cars HK（2927 3388）
「T」形指揮燈被廠方稱為「雷神之鎚」，外觀係幾靚仔嘅。 旗艦車就係要將車廠最強嘅嘢show off，新款XC90絕對係Volvo曬冷之作，車內用上極多現今最潮設計，有唔少更加係前衞！有理由相信今代又會玩10年8年。此外，值得留意係今代XC90車身大幅加大，比上代大成個碼！而且早預設full size 7座位，唔再難為第3排乘客。
純瑞典血統自2010年被中國吉利汽車集團全資擁有後，Volvo嘅去向實在令好多車迷擔心，擔心咩？你懂的，唔使我多介紹吧！當筆者第一次見到、摸到全新一代XC90時，心情實在有啲激動，情況就如見到90年代嘅海港城一樣，冇土豪味、冇大媽嘅鮮艷服式，XC90內外都如宜家家居產品一樣簡潔，保留百分百瑞典味！廠方表明新車全由瑞典設計，今代更重視家庭感覺，所以用上全新SPA多用途底盤技術，車身增長143mm，達4,950mm，軸距亦增長127mm，去到2,984mm水平！保證車內有更大空間。
新款外表細微處都以簡潔為主，放大嘅鬼面罩有啲圓渾，而略細嘅頭燈內置有「T」字形指揮燈，前衞！車尾方面，尾燈罩上延至接近車頂，而且尾門放棄上下開啟方式，用返電動上揭式，相信更耐用。
用上275/45R20輪胎，行車穩定性得到保證。
頭唇設計都幾齣位！有尖角凸出，似足跑車。 高科技設備XC90車廂簡潔，簡潔到中控台只用一塊9吋touch mon.控制全車所有功能！就如Tesla Model S一樣，連冷氣系統、車輛設定、音響設定都用呢個mon.搞掂，後座冷氣都係一個小型touch mon.！喜歡玩電子玩意嘅人一定愛死，但對平板電腦抗拒嘅人就大鑊嘞，一定有排適應。
此外，表板都用咗12.3吋巨型彩mon.，可以作出4款外觀轉變，而行車模式改動都會令轉數表變樣，可顯示唔同資訊，夠曬in！唔好再話Volvo出品老土嘞！除咗夠in外，XC90車廂都用盡高級嘢，全車有19個Bowers& Wilkins喇叭單元，靚聲到好似置身音樂廳內，煲現場錄音嘅天碟一流。
駕駛艙極之簡潔，但用上最好真皮同木料，加上上乘手工。
中控台頂部有中置B&W高音喇叭，外表極靚仔。
Engine Start扭掣同DRIVE MODE掣都用咗鑽石切割紋。
中控台以9吋平板touch mon.操控全車設備。
後座冷氣都用touch mon.操作，指尖輕掃已可調節溫度。
天幕式天窗，覆蓋面積接近最後排車頂。 充當7人車瑞典人熱愛家庭生活，上代XC90雖然都有7座位設計，但礙於車身大小問題，第3排座位只可當成臨時作用，今代就唔同嘞，軸距長咗令到第3排坐成人都冇問題，筆者5'5"高坐落都唔頂腳，舒適性唔弱，而且有齊獨立冷氣出風口及車頂喇叭，可以同中排媲美。Volvo一向最注重安全，前座安全帶有自動收緊功能，而且全車座椅骨架同坐墊都有卸力設計，可以防止撞車時拉傷脊椎，同級中獨有。此外，XC90都配有自動剎車系統，只要車速喺50km/h以下，感應到前方有障礙物就會發出警號及自動剎車。關乎到行車安全嘅系統仲有自動矯正行車線、盲點車輛提示、自動泊車系統等，同級中冇車可以比得上佢。
ECO模式轉數表會變成功率輸出顯示。
Off Road模式時速度表會限制喺40km/h範圍。
Normal及Dynamic模式表板顯示大致相同，只有引擎同波箱反應有分別。
將中、後排摺埋後可得出完全平坦尾箱。
前座有多方位調校，而且有冷氣暖氣系統。
中排空間相當充裕，中間位更可升起坐墊變成小童座。
第3排係足size雙座位，可輕鬆容納2名成年人。 孖叉新引擎廠方今次以「A NEW BEGINNING」作為新車宣傳口號，絕對冇吹水，XC90真係由外到內都全新！T6版本引擎採用全新開發Turbo+Supercharger型式，只用1,969c.c直四引擎已經可發出320匹馬力！勁到不得了！而且波箱升級為8速款式，表現可以話脫胎換骨，車身重量降至唔夠2,000kg，加速爽快又順，彎路表現較上代平穩得多，尤其當行車模式切換至Dynamic，引擎同波箱有更好反應，加上軚感唔差，唔似揸緊部車長近5m嘅SUV。
全新引擎得到雙增壓器幫助，2.0公升容積可爆到320匹馬力！堅！
8速自動波表現出色，唯一美中不足係只可用波棍操作+/-模式。
星光推新車既然Volvo已經由中國車廠全資擁有，XC90喺國內發佈當然要隆重其事。早前車廠邀請全國多間傳媒到上海出席發佈會，而且即場宣佈會送出限量初版XC90畀國內有頭有面名人嘉賓，演藝界有香港導演吳宇森、國內名演員陳道明及京劇大師梅葆玖，名人則有前國家跳水王后郭晶晶及聯想電腦創辦人柳傳志。
發佈會歷時3小時，各嘉賓上台講出對Volvo嘅感受，現場仲有XC90嘅詳細解構，傳媒及嘉賓都可以細心研究新車每一特色設計。
XC90上海新車上市慶典中，名人及演藝界星光熠熠撐場。
會場外有名牌詳列名人獲配嘅限量XC90資料及量產編號。
進入會場有長達50米嘅光影走廊，不斷顯示大自然環境，切合Volvo嘅品牌形像。
除XC90係主角外，場外都列出Volvo全部車系。 超短試車會車廠亦有安排傳媒到戶外進行試車，不過試車活動同筆者所諗有好大出入，現場所有人工越野金屬架只係示範作用，由工作人員先後駕駛BMW X5、Land Rover Discovery同XC90比較攀爬效果，香港傳媒只可以平路扭雪糕筒，就算出路面試車，都只係喺冇乜車嘅路面試大約10分鐘……幸好代理已有新車到港，筆者先可以試真新車。
兀起尾轆都可以輕鬆駛離障礙。
工作人員示範以XC90慢爬上高台。
香港傳媒只可喺呢個以雪糕筒砌成嘅試車道上試車。
