陳凱琳演技浮誇成《巨輪II》死因？！

大台喺2013年播出由陳展鵬、蕭正楠、鍾嘉欣同田蕊妮主演嘅劇集《巨輪》，當時被觀眾捧為神劇之一。一向睇收視食飯嘅大台，梗係食髓知味拍《巨輪II》，仲吼準時機，安排劇集緊接《城寨英雄》播，以為可以食住《城寨》同埋《巨輪》嘅餘威，斷估會有個底，但係冇諗過，《巨II》播完第五集，觀眾已經嘈到拆天，仲話套劇已經播咗大結局！

嚇，套劇明明39集，何來大結局呢？原因好簡單，因為大家最期待嘅畫面，即係第一輯主角陳展鵬同嘉欣BB嘅結婚戲份，已經喺第五集出咗街，之後佢哋就冇再出現過喇！故事發展落去，亦唔再係之前嗰輯咁，講兄弟情講奮鬥史，反而集中喺女主角陳凱琳身上，仲要硬插啲強姦戲嚟谷收視。

話說《巨II》講到陳凱琳被「父親」吳岱融強姦嘅戲份，花生網民就話《巨輪》變「亂倫」！亦有唔少網友批評套劇，話阮兆祥同田蕊妮原本係夫婦角色，今次夾硬被拆散。再加上劉思希同陳凱琳嘅演技相當浮誇，有網民更希望該劇腰斬。

網民咁多不滿，《巨II》收視梗係唔會太好，平均收視曾經只有23點（約149萬人次收看），咁身為女主角嘅陳凱琳之前出席活動時，除咗話介意收視唔好之餘，再講到佢演技被狠批一事，佢就話：「朋友都有問，我是有啲不開心，但不可以一下子改變點演戲，要一步一步來。」
from:http://hk.apple.nextmedia ... 161016/19802487

有指鄭嘉穎介意女友陳凱琳拍裸泳同被姦戲，開工時黑面。資料圖片

陳凱琳拍《巨輪II》畀劇中養父吳岱融險強姦一幕，吳岱融演技被網民大讚，反而陳凱琳就被指戲屎，點知原來呢一場戲，仲激嬲埋男友鄭嘉穎，而鄭媽媽亦有微言，覺得陳凱琳好蝕底。噚日有周刊指鄭嘉穎近日睇到網民留言，佢即有啲躁，日前嘉穎唔知係咪因呢件事影響心情，失控拍枱鬧導演。

陳凱琳喺《巨輪II》有場畀養父吳岱融險姦戲。資料圖片
介意裸泳

周刊又指，陳凱琳早前試過同嘉穎講自己同蕭正楠有一場喺沖繩嘅「裸泳」戲，點知嘉穎好大反應，仲叫佢唔好拍，可以代女友搵監製傾。陳凱琳最終說服到男友，但之後拍嗰場被姦戲，唔知係咪怕男友又介意，有傳陳凱琳隱瞞拍被姦戲一幕，喺呢幕播出之前，佢先主動同男友及未來奶奶解釋，當時嘉穎有啲黑面，但就冇怪責女友，只係講呢行接戲嘅利弊。

據知嘉穎一向好緊張女友，近日拍新戲《迷》時開工黑面，有知情者話有次拍廠景，導演叫佢拍幾個散shot，嘉穎就拍枱話唔好阻住，係咁爆粗，一句唔拍就即走，成場呆咗。知情者仲話嘉穎開工成日請工作人員食嘢，相處得幾好，但播女友被姦戲嗰排就有啲火，而鄭嘉穎至截稿前仍未回覆。

撰文：馮仁昭
from:http://hk.apple.nextmedia ... 161021/19807281