田蕊妮曬白滑美腿搶鏡

近日忙於拍無線台慶劇《誇世代》嘅田蕊妮（阿田），劇中擔正做歐陽震華（Bobby）個老婆凌潔茹，有大膽床戲之餘，又要同吳業坤玩「姊弟戀」，更要嘗試做多種職業，包括：主持人、記者同演員，演技上都幾大挑戰。好在，「老公」Bobby開工時，都會講嚇有味笑話，緩和嚇氣氛，等阿田冇咁大壓力，發揮都好啲。

日前，東姑喺觀塘泊車期間，就撞正田蕊妮拍緊《誇》外景，同場仲有江美儀同李佳芯（Ali）。當日飾演記者嘅阿田，起勢追住演醜聞多多嘅千金小姐Ali係咁鬧；而演Ali家姐嘅江美儀，就喺隔籬幫手勸交。雖然三個女主角年齡加埋過百歲，但都要著短裙上陣，令東姑目不暇給。當中就嚟四張嘢嘅阿田，更加係保養得宜，雙腿依舊白滑，絕對唔輸蝕比後輩Ali。

至於近日生濕疹嘅Ali，事後佢就向東姑透露最新病況：「呢幾個月天氣轉，啲濕疹開始生上面，好慘囉，因為我唔敢抓佢哋，同埋成日上妝罨住，搞到好痕咁囉，一抓又起粒粒。我試緊啲中藥，其中一個中醫話我要清咗感冒底先，但食完嗰啲中藥，個人好攰，加上呢排又忙開工，睇咗一次就冇睇嘞。」希望「女神」早日康復，繼續拍多啲好嘢慰藉嚇班宅男啦！

已經三十九歲嘅人妻田蕊妮，呢日著上黑色短裙仔，要喺停車場上狂跑，不經意咁曬一雙白滑靚腿。

當日，阿田同十幾個臨記記者追訪Ali﹙圓圖﹚，佢一開始就連珠發炮，一臉惡形惡相。

四十有五嘅江美儀，同樣曬出一對白滑長腿，不過拍攝前，佢就貪舒服踢拖上陣，不拘小節。

田蕊妮早輪同吳業坤（左）拍完《迷》後，呢排再合作拍新劇《誇世代》，劇中仲大玩「姊弟戀」。

開工時，阿田嘅「老公」，Bobby會講嚇有味笑話，緩和嚇氣氛，等「老婆」冇咁大壓力，發揮都好啲。