今年50歲嘅鄒兆龍，向來被指係好爸爸、好老公，不過日前有女子喺微博圖文並茂公開爆料，指佢背老婆翁為德大搞婚外情，更腳踏幾船，事後《蘋果》曾聯絡鄒兆龍，但其電話已熄機。
其實，以往圈中亦有同類事件發生，要數最轟動，應該係6年前，林峯同內地女星潘霜霜嘅「覺覺豬」床照曝光，「乖乖仔」形象毀於一旦。床照事件後，林峯急急同潘霜霜劃清界線，透露二人已分手數月，被指畀人「出賣」嘅林峯一副殘樣面對傳媒，至於女方都係以遺失電話為由，唔想多作解釋，二人關係正式告終。
同年，林峯好兄弟吳卓羲，俾大陸女星張馨予，闖入微博「宣示主權」，更喺吳卓羲微博中，貼上床照，間接逼吳卓羲承認戀情。事後張馨予聲稱唔小心用咗吳卓羲個微博，令二人親密關係不攻自破。
翌年，有指吳卓羲背張馨予搭上富家女X小姐，有指X小姐不甘男方劈腿，公開男方自拍半祼照及情慾短訊。吳卓羲指事件不實，又稱係一場誤會，事後有一自稱係X小姐嘅讀者，向傳媒稱同吳先生係好朋友，短訊同錄音內容都只係「好朋友」嘅溝通方式，而張馨予最終決定同吳分手。
今年，受高登仔追捧嘅40歲填詞人梁栢堅，被一女網民貼相，指斥男方：「填詞人梁栢堅已有女友，瞞騙並令另一女事主懷孕，然後不顧而去，希望不要再有另一個事主。」並附上兩張梁栢堅疑似喺酒店房嘅半身裸照。其中一張相係梁瞓喺床上閉眼熟睡中。事後梁遭網民鬧爆不負責任。
from:
http://hk.apple.nextmedia ... 170828/20135091
