今年50歲、90年代玉女歌手黎明詩（Stephanie），日前孖同性密友Kelly出席活動並大方承認出櫃。95年淡出樂壇，97年與銀行家男友結婚，04年婚姻亮紅燈，經歷了幾年人生低潮的Stephanie，感恩當時身邊有家人及好朋友支持，撐過低潮，前年Stephanie重遇三十多年前在英國讀書認識的Kelly，原來對方一直將愛埋在心底多年，令二人由朋友變成密友。仍未正式搞離婚手續的Stephanie：都半百喇，希望做番自己。
屋企人支持
久休復出的黎明詩身形圓潤，笑起來仍然很甜美，五十歲還帶點少女味，剛宣佈出櫃，爽朗的Stephanie有問必答，關於另一半Kelly，她說：「兩年喇，好好朋友然後再好啲，佢好支持同鼓勵我，好多正能量。最緊要生活開心，自己都半百喇，梗係希望做番自己，身邊有好多朋友對我好好，好感恩，屋企人都好支持我。」Stephanie說。
出身玉女歌手的Stephanie，當年著三點式泳衣出鏡，已經相當大膽。
Stephanie出道時愛作日本妹打扮，跟鄭秀文有幾分相似。成日喊成日飲酒
九五年淡出後，Stephanie與銀行家男友於九七年結婚，婚後做過保險經紀，她說：「做過兩年保險，但都唔係咁適合，可能我唔係咁識主動去social，有個舊同學叫我試嚇做，後來佢轉去第二間公司，我就唔做喇。」冇做保險後，Stephanie做回全職主婦，每天都是打掃家務、煮飯，直至○四年，婚姻出現危機，對她造成打擊，跌落人生谷底。「最低潮時成班朋友陪我，當時都好唔開心，成日喊，成日飲酒唔食嘢，嗰陣時好瘦！會問自己點解搞成咁，又會問佢點解會咁，都搵唔到個答案。我前夫個人好好，只係大家唔識得互相瞭解。」○四年婚姻出現問題，直到現在還未正式搞離婚，拖拉十多年，最終雙方都是決定離婚。「未正式去搞，但係講咗，即將會做。」Stephanie說。
那些年，孖辮妹就是Stephanie，而同期歌手有郭秀雲、吳國敬和許秋怡。
跟劉德華合作過電影《人海孤鴻》，戲中更有嘴嘴場面。老公知情
Stephanie跟銀行家丈夫離婚，但二人再見亦是朋友，她會向對方講自己近況。
據瞭解，Stephanie未重遇Kelly時，已開始跟老公分居，二人至今仍是朋友，所以，轉了性向及有了新伴侶Kelly，她向他坦白。「我同Kelly一齊，有話俾佢聽，佢都平常心嘅，分開係因為兩個人之間一直都有問題，只不過一路冇去解決，大家擺喺心度唔拎出嚟講，生活上冇溝通嗰啲問題，一直積聚。」事過境遷，現在的Stephanie只希望生活開心，這樣已經心滿意足。
心裡一直有黎明詩
Stephanie大方講戀情，Kelly亦表白對另一半有份情意結，埋在心底三十年，她說：「其實我嗰陣喺英國讀書（三十年前），佢喺唐人街都頗出名，好多同學都會去佢媽咪間越南餐廳食嘢，其實係特登過去望嚇佢，當時心中已經有呢個女仔，之後佢返咗嚟做歌手，個心一路都有呢個人。」
兩年前再遇Kelly，二人由朋友變為密友，未變圓潤的Stephanie依然清秀。
上年生日，Kelly特登為她搞了生日P，並以「男人打扮」為服裝主題。
Stephanie自言在人生低潮時，幸得一班朋友支持渡過難關。請無線食檸檬
由薛家燕、黎小田、曹永廉及湯寶如合作主持的音樂節目《流行經典50年》，大受樂迷歡迎。
無線食老本的懷舊音樂節目《流行經典50年》，搵來不少80、90年代歌手演出，好似黃翊、張立基、溫碧霞等都有俾面上節目。雖然唱完後人氣急升，無線亦有向Stephanie打主意，她卻未有應承：「係呀，但我覺得未準備好，因為我肥咗啲啦，減番清秀啲，到時再算。」
淡出22年再上台
燦星製作聯合浙江衞視主辦的《中國新歌聲第二季香港賽區海選》日前在銅鑼灣HMV舉行，請來Stephanie擔任終極複賽評判及表演嘉賓，除Kelly出現撐愛人場外，餅印妹妹黎杏心及弟弟都有到場支持，說到底，這個是Stephanie淡出樂壇22年後，首次在公開場合唱現場，她選了當年自己的熱播情歌《愛上不愛我的人》，好彩Stephanie平日愛唱K，訓練有素，keep住水準。
Stephanie感謝大會的邀請，她本來純粹做評判，之後大會幾番要求她演唱，最後，她選了自己當年的抒情慢歌《愛上不愛我的人》。
餅印妹妹黎杏心（箭嘴）與弟弟（白衣）齊到場支持家姐，可見他們的感情很好。
Stephanie上台演唱時，伴侶Kelly全程在現場遙遠支持她，並拿手機攝錄。
燦星製作聯合浙江衞視主辦的《中國新歌聲第二季香港區海選》，日前已順利完成，當日，大會特別邀請黎明詩擔任評判及表演嘉賓。
撰文、攝影、攝錄：娛樂組
場地提供：HMV
化妝：Jan Chan@ Annie G
髮型：Will Yu@ The attic
