阮兆祥（祥仔）呢期曝光度超高，星期一至五有《溏心風暴3》，星期日又有倉底劇《性在有情》見到佢；加埋鋪天蓋地，同王祖藍、李思捷嘅「福祿壽」十周年演唱會宣傳，真係老是常出現。不過，見得多反而驚會厭，何況佢喺《溏心3》裏面飾演嘅「梁贊（Like gor）」，已經畀網民勁彈，評佢演技浮誇，兼潮語金句泛濫，實在太過「煩膠」添！
好似早前，東姑喺銅鑼灣巧遇祥仔，見佢一身黑衫、黑褲、黑超，十足巨星咁嘅派頭，兼夾頭岳岳拎住支涼茶，喺鬧市街頭行過。一般來說，都會有唔少街坊粉絲認得，並且打招呼「集郵」下；不過，呢日居然見佢逢人過人，逢街過街，都未有人理會，似乎有啲失威。睇嚟「like gor」呢個角色，唔單止幫佢唔到「呃like」，仲連提升人氣都冇乜幫助，套劇收視同口碑，認真係慘不忍睹！
喺《溏心3》飾演「梁贊」嘅祥仔，畀網民勁彈佢演技浮誇，兼夾潮語金句太泛濫。
祥仔大踏步神情確威武，加上潮服同埋黑超，好有巨星feel。
行經銅鑼灣大街大巷，途人居然有眼不識泰山，連眼尾都冇「梢」下佢。
