日前，朱晨麗同伍允龍喺將軍澳工業邨，為新劇《兄弟》拍攝外景，東姑專誠去探班。當日劇情講述，飾演國際刑警嘅朱晨麗，突然發現被人追蹤，兼被貨車撞車尾，咁啱飾演重案組探員嘅伍允龍經過，於是上演一幕英雄救美。
由於現場拍攝嘅一場撞車戲，朱晨麗只負責畀反應，動作場面則交畀伍允龍，佢不單止要跳上車頭蓋，仲要揸槍還擊。伍允龍大顯身手，當然搶鏡；不過，朱晨麗喺埋位前不停補妝，執到最靚、最四正，同樣吸睛。當拍完撞車戲，朱晨麗便由幾名工作人員攙扶落車，所以話靚女係着數啲嘅。
事後，朱晨麗同東姑透露拍攝過程順利，冇受傷，仲好開心有伍允龍呢個拍檔，皆因對方不時教佢動作戲嘅步法，令佢嘅出拳同踢腳，拍出來都更有力度。由於佢哋喺戲中係演情侶，未知會否擦出愛火花呢？男友何廣沛要（目及）實啲啦！
當日拍攝嘅場面，講述朱晨麗喺揸車期間，突然發現被人追蹤。
朱晨麗被尾隨跟蹤嘅貨車猛撞後，嚇到面容扭曲，一臉恐慌，七情上面。
女人貪靚，朱晨麗匿埋一角補妝，即使係拍攝撞車戲，但都要顧埋個靚樣。
朱晨麗與伍允龍喺劇中係戀人，仲會開花結果；不過，當日就拍追逐戲，不時背對背，一啲都唔浪漫。
