拍拖5個月，爆黃宗澤秘戀鼎爺徒弟朱庭萱

黃宗澤（Bosco）入行至今桃花旺盛，女友與緋聞女友多到十隻手指數唔晒；最近，他的過氣女友名單被揭再添一名。事緣，無綫節目《我係小廚神3》的女廚神、兼李家鼎的徒弟朱庭萱（Bonnie Chu，玻璃朱），在其網誌「玻璃朱城」中，自稱曾與黃宗澤拍拖五個月。
因為，當年黃宗澤年紀尚小，未能給予朱庭萱安全感，所以令這段「姊弟戀」最終分手收場；而她更指自己那時傷得很深，要自閉三個月才痊癒。不過，兩人再見亦是朋友，她依然力撐Bosco，日日追看《溏心風暴3》。

被封為「女廚神」的朱庭萱，自爆曾與黃宗澤拍拖五個月；而最近積極在幕前發展的她，還成功向李家鼎拜師學習廚藝。

雖說，黃宗澤曾傷透朱庭萱的「玻璃心」，但兩人現已做回朋友；去年，黃宗澤與媽咪還相約朱庭萱及契姐Twin飯敍。

幕前發展無綫節目《我係小廚神3》中的女廚神朱庭萱（Bonnie Chu，玻璃朱），最近積極在幕前發展，還成功向李家鼎拜師學習廚藝，令其人氣急升。本刊在她的網誌中，發現她自爆曾與黃宗澤有過一段「姊弟戀」：「我哋大約01年尾02頭拍拖，只係拍咗五個月，當時佢對我都算係噉（咁），佢媽咪、分居嘅爸爸、契姐、契媽我都見過晒，佢都有見我媽咪，仲成日去佢屋企食飯⋯⋯佢當時做緊eyt（EYT），雖然收入唔算太多，但每次食飯大多數佢都會比（畀）錢，當然我哋會食D（啲）平嘢⋯⋯佢都有借過我車揸，但男女朋友哩D（呢啲）好正常唧（啫），又唔係比（畀）佢攞去⋯⋯！」
不過，這段戀情很快因為黃宗澤無法給予女方安全感而告吹：「佢係比較無咩交帶，始於當時都係細個啦⋯⋯可能我又嫌佢比（畀）唔到安全感我，佢又嫌我煩⋯⋯大家就分開咗啦⋯⋯咁多個男友哩（呢）個分手係最痛，自閉咗成3個月⋯⋯又唔見人又唔出街，到後尾去日本睇完世界杯（盃），旅行完番嚟先正常番⋯⋯點解噉（咁）痛?可能係大家係（喺）分手時有D（啲）誤解，以至不歡而散啩⋯⋯！」難得，最後二人再見亦是朋友；而據朱庭萱形容，當年他們分手後大約年多，曾在一間disco重遇，跟着還一起玩骰盅。

朱庭萱透露與黃宗澤分手時，她傷得非常深，搞到要自閉三個月。

朱庭萱不只身家豐厚，身材一樣豐滿，難怪得到黃宗澤的垂涎。

黃宗澤（Bosco）自舊年約滿無綫後，便加入邵氏，並成立自家嘅工作室，進軍內地拍劇之餘，近日又錄埋歌，再戰樂壇，瓣數多多。而佢之前拍落嘅《溏心風暴3》亦都已經面世，劇入面，佢演嘅多情富二代凌乘風，攬女無數，牀戰連連，兼要大騷肌肉，相當吸睛。據知，現時忙緊拍邵氏網劇《守護神》嘅佢，仲將會演出內地網劇《我知道你的秘密》，除咗做法醫之外，又要一人分飾兩角，肯定係演技大挑戰。

日前，東姑去咗深圳揼骨，咁啱就撞到Bosco同劉心悠喺一間茶記，為《守》拍外景。當日一身便服、身為男主角嘅Bosco，開工期間唔單止有助手傍身，而且無論行到邊，都有成村人護駕，劇組仲出動埋架私人化妝車畀佢休息，排場十足；加上，喺拍攝現場，佢不時口噏噏，指揮其他工作人員，成個邵氏「一哥」咁款。另一邊廂，劇中女主角劉心悠，近日為咗套劇剪咗短髮，感覺耳目一新。當日，心悠同Bosco都有場吹水戲，二人事前都不斷咪劇本，難怪幾take就拍晒喇！

早前，劇組就遠赴布拉格拍外景，期間，Bosco就趁空餘時間，不惜趴喺路上，幫戲中演佢「下屬」嘅苗僑偉（三哥）同佢太太戚美珍影合照。平日開工，Bosco又會同三哥及許紹雄一齊開餐；睇嚟，佢雖然身份升呢，但私底下都冇乜架子喎。

當日，Bosco喺拍攝現場，不時口噏噏，指揮其他工作人員，甚有「一哥」嘅風範。

女主角劉心悠埋位前，除咗歎啡咪劇本外，又不時「碌」吓電話入面個rundown。

埋位前，Bosco不斷拎着份劇本係咁咪，咁重戲份難免會緊張啲。

平日開工，Bosco同三哥及Benz雄就喺架私人化妝車上面開餐醫肚，兼聯繫吓感情。

夠鐘收工，Bosco即由多名工作人員陪同下，登上呢架化妝車鬆人。