拍拖一年閃電結婚、未到兩周年結婚紀念，已經成功誕下首個愛情結晶囝囝Brendan（李奕霆），35歲結婚37歲生仔的胡杏兒從來不諱言希望抓緊時間在40歲之前要生至少兩個，據悉兒子Brendan未擺百日宴，杏兒已經與丈夫Philip計劃定追多個。
老公Philip係三代單傳，長居英國的李老太都專程回港入住二人大埔逸瓏灣豪宅,實行全天候湊孫順手再照顧新抱協助火速完成追B大計。據悉雖然生仔前同奶奶一直相處融洽，不過相處好同住難，對足三個月、湊B分歧又多多，好相與如杏兒都開始向身邊密友抱怨。
撰文：東方新地圖片：東方新地
杏兒全力湊仔享受家庭樂
女人38，分秒必爭。剛滿38歲的胡杏兒在短短兩年內完成為人妻再為人母心願，不過距離40前生三個目標就仍需努力。所以陀B不久已經講定趕時間生多個、分娩又為容易恢復而選擇順產、生完Brendan更餵母乳為陀下胎做準備，既不會節食趕修身、也暫不接電影電視長時間工作趕復工，萬大事都大不過趕在40歲之前生夠三個。Brendan現時剛滿三個月，三個月來杏兒僅僅出席過兩個公開活動，其他時間都全心全力用來湊仔和享受家庭樂。
周日（14日），胡杏兒兩公婆帶埋囝囝、奶奶同陪月往大埔晚飯，一見記者，Philip護妻護兒心切，一支箭標前。Philip婚後被杏兒拿手廚藝養到肥肥白白，現幸福雙下巴。
老公幸福肥，餵緊人奶又plan定生多個的杏兒亦相當豐滿，態度友善向記者打招呼。
Philip一見記者鏡頭，連忙叫負責推BB車的李媽媽用被仔遮實寶貝仔。
表面怕上鏡，其實第一個透露性別、第一個晒出Brendan正面樣都係爸爸Philip。
家庭日奶奶傍實
丈夫Philip經常在個人IG帳戶晒三口之家家庭樂，一時孭住個仔行山、一時就去到西貢市歎漢堡吹海風，不過本刊日前所見，其實李家日常不止夫妻兩同Brendan三個，原本移居英國多年的李媽媽最近亦搬回港，還索性長住杏兒同Philip的大埔愛巢，幫助新手媽媽湊仔、亦主理一家三口日常飲食，為再抱孫調理新抱身體。周日（14日），杏兒一家老嫩驅車往家附近的大美篤搵食。
有奶奶同行爭住湊B，杏兒遞上冷帽給奶奶為BB戴上，見無從插手，索性自己先行到餐廳搵位。
李家第三代第一個金叵羅自然緊張，所以李媽媽專程從英國飛回香港全天候入住杏兒家照顧。
老人家湊仔有一套又愛話事是常識吧？所以一行人到埗，杏兒無從插手，就算陪月同行，但亦全權交由奶奶一手一腳將囝囝放妥在嬰兒車內，並為他戴上冷帽，緊張BB免著涼。星期日家庭日食晚飯，想不到一家人既不是靚裝餐廳也不是大魚大肉，反而貼地在茶餐廳解決。一人一碗餐蛋麵一支熱維他奶、再加三兩碟燒賣，極速半個鐘就醫好肚打道回府。
食物未到，Philip興起叫一行五人齊齊影番張大合照，不過今次就唔見佢擺上個人IG。
老公公事繁忙撳電話，杏兒就好識做陪住奶奶坐，短短一餐飯半粒鐘，都不斷撩奶奶傾偈。
婚後度足三個月蜜月，當然一定要飛去英國探奶奶，當時Philip就經常相，以示婆媳關係非常融洽。
要餵人奶又一心諗住生多個，所以杏兒產後唔見修身，反而經常大吃大喝好好胃口。
Brendan滿月因為杏兒未坐完月只能在家開，當時就請埋蘇永康一家三口，所以希望百日宴可以大搞。
百日宴親自揀場
杏兒初歸新抱，外人看來未見有婆媳問題，生B前更手挽手行街旅行、當晚晚飯亦識做選擇坐在奶奶身邊，不時輕鬆暢談，一睇就知杏兒孝順長輩同奶奶感情不錯話題亦不少，不過據知情人士透露，奶奶自十月初Brendan出世前已經回港，同住超過三個月依然未有離意，的確讓小兩口少了不少私人時間：「始終相見好同住難，之前去旅行探奶奶兩公婆都係住酒店，真係未試過對足咁耐。
今個月17日Brendan正式滿百日，杏兒一個月前開始籌備，上周三（10日）同老公Philip齊齊去到九龍塘睇場傾細節。
其實杏兒都盡量孝順老人家唔想Philip難做，但係始終嗰個係李老太個仔同孫，煮咩飯煲咩湯，老人家都想自己嚟，唔係好buy杏兒嗰啲；最大分歧當然都係湊B，老人家有一套、杏兒又有一套，尤其係坐月嗰陣時，奶奶好緊張BB同杏兒身體，其實係基於錫新抱同孫，但搞到杏兒同陪月根本就插唔到手。杏兒承諾會再生多個，但被人催得多，就有壓力，奶奶又勸佢唔好飲凍嘢又話佢鍾意食嗰啲冇益，真係會哦到壓力好大⋯⋯跟住Brendan又就嚟百日，為免同奶奶再有乜意見分歧，佢同老公傾咗好耐，堅持全權負責自己搞，當然會盡量就番圍村親戚，揀咗九龍塘大家就腳啲。」
自己話事成個百日宴，杏兒在宴會場地逗留大半個鐘，四圍參觀又指指點點。
傾掂數，兩公婆先後同場地職員握手道別。
今個月17日Brendan滿百日，本刊就發現杏兒果然親力親為，一早同Philip從大埔出發直駛九龍塘睇場地。目測杏兒指手劃腳又熟晒路，已經不是第一次實地考察，室內室外樓上樓下睇足大半個鐘，杏兒同Philip才出現會所門口與工作人員傾定最後細節，然後禮貌地先後和職員握手道別。四季薈地處九龍塘、最多可以筵開16席中式酒席，可以招呼百多二百名賓客。
搵完場地，Philip車杏兒往尖沙咀salon set個靚頭，原來兩公婆當晚要出席友人婚宴。
經濟百日宴
第一次做媽媽第一次搞百日宴，一向貼地務實的杏兒都係選擇中價私人會所，而不是為場面選擇五星級大酒店。地點位於九龍塘，方便男家沙頭角親友，地點又夠私隱唔怕被傳媒粉絲打擾。而酒菜和人數，最低消費係約16圍酒每圍六千大元包酒水，夠晒實惠！
宴會場地布置別緻又雅觀，合晒杏兒要求，不過就僅僅可擺16圍酒，睇怕Brendan百日宴賓客要嚴選至夠坐。
場地有分室外室內又有小酒吧，入場費起跳每圍五千蚊。
奶奶入主管三餐
新婚後不時見到杏兒晒廚藝、Philip 晒恩愛，煮得一手好菜的杏兒近日就因為廚房大小事都被奶奶搶住嚟做明顯減少落廚。其實杏兒8歲時父母離異，小時候與父親同住、少女時代就在愛爾蘭讀書自己照顧自己，家有一老雖然係福氣終於有媽媽照顧，不過就算出於好心和關心，多個人常在左右嘮叨，的確會覺得冇自由失自由。
廿四孝李媽媽畀錢時見到花旗參又買多幾両、臨走見到其他款湯包又再折返買多兩包。
買完湯料再去區內老字號餅家，睇完又睇，終於等到兩盒新鮮出爐中式糕餅。
接手全家飯餸湯水後，李老太由買餸煲湯煮飯都落手落腳親自嚟。日前本刊發現Philip媽媽由司機接載從逸瓏灣出發，去完跌打舖睇症，不是回家休息，而是直接去藥房買湯包、花旗參，再專程去老牌餅店買番兩盒中式糕餅回家慰勞兒子和新抱，絕對是廿四孝奶奶。
專程從英國飛回港都係為照顧孫仔同新抱，李媽媽每日都會親自出動購買餸菜和煲湯材料。
一袋二袋買完等司機，唔睇都唔知事前李媽媽才睇完跌打，為了兒子新抱完全忘記自己病痛。
多個人錫多個人照顧其實係好事，最緊要肯包容多溝通，唔係做電視劇，唔好搞到野蠻奶奶大戰戈師奶就得喇！
有子萬事足
生完仔兩個月，杏兒日日攬實囝囝、又經常自爆想生多個、掛住BB在肚內感覺，據悉想學葉翠翠產後半年速孕到，最好可以好似陳茵媺四年抱三，李家新抱任務完成。
