留言集:英紅無淚　惠英紅

1^# 大中小 cheshire (IP: x.184.192.x) 發表於 2007-11-27 09:30 發短消息只看該作者

相關主題: 惠英紅

惠英紅四十七歲，陳小春四十。
相差才七年，在《鐵咀銀牙》里，前者已是後者之母。情況一如商天娥與郭晉安那樣叫人動魄驚心。
是女演員不襟老，還是男演員保養得好？
兩者皆不盡然。歸根究柢，市面上能打能演又能放下身段扭盡六壬的，沒有幾個。

惠英紅不是老，只是出道早。
四歲，在紅燈區打滾；十二歲，在夜總會跳舞；十五歲拍戲，十七歲做女主角，廿二歲成為影后。
論人生閱歷之豐富，待人處世之智慧，何止做陳小春阿媽，做他阿嫲還綽綽有餘。
「做人阿媽嘅心理關口一早克服咗。睇下我家姐，就知點教仔！」沒有半點悲涼。
有錢有樓，也有獎揸手，只是命格太強，沒有英雄折腰。
「梗想有個伴，但唔敢期侍，萬一嚟啲烏蠅

，咪仲衰，哈！哈！」
徹頭徹尾的烈女，向來容不下眼淚。
萬一真的來隻烏繩

，以惠英紅身手，最多打死罷就。

我識演戲
惠英紅舉手投足，有陣自然而來的霸氣。這樣的女人，應該叱吒風雲，做社團大家姐之類，而不是圍著子女團團轉。
「現在拍電視劇，只會問：『有無戲做先？』有得發揮，戲份少啲無所謂；無得發揮，俾廿集你做主角咪又係行行企企。
「拍咗三十年戲，仲打？幾歲呀？依家拍戲又唔係為錢，點解唔揀自己喜歡做的角色？」
演無知師奶、傳統婦孺，我們都以為惠英紅大材小用。殊不知，都誤會了。
「就係唔想再被人定型為打女。最憎人話『唔打就曬咗惠英紅』，即係話我唔識演戲，我會好嬲！」
惠英紅兩眼發亮，很認真。
「第一日入行，我就識演戲。」
可不是，她是第一屆香港電影金像獎「最佳女主角」，得獎電影《長輩》，一九八二年。
「師奶角色，係專登揀，因為以前未做過。師奶你估易做？愈平淡愈難演。
「做郭羨妮阿媽（《學警雄心》）都仲OK ，因為講我好後生就俾人搞大個肚。但小春阿媽就……（大笑）最初，以為佢卅歲左右，真係唔知佢咁大！」
惠英紅終於笑了，又有另一番千帆過盡的味道。有過姿色的女人，都有點不許人間見白頭。
「做人阿媽，依家唔介意，但曾經都有心理關口要過。最難接受係六、七年前，心境仲好後生，但睇住自己皺皮，連鏡都唔敢照。同朋友影相，永遠叫人delete 。」
六、七年前，應該是四十大關。少女時代早已過，做綠葉又未至於，高不成低不就，女演員的最大尷尬，莫過於此。於是，她去了搞美容生意。
「轉咗行，都仲有少少優越感，因為點都比一般人靚，但好快又要面對現實。」
權宜之計，只維持了五、六年。○五年想通了，復出拍戲，像《妖夜迴廊》、《神經俠侶》，已完全改變戲路。
「我會同自己講，四十幾歲人，從來無整容，都keep 得幾風華絕代啊！仲想停留響廿歲，不如一早死咗去。」

窮到無人信
惠英紅說話，從不矯飾。靚會認，時不與我也認。做人，最重要就是接受現實。她既能夠接受自己四歲便要養家，相比之下，韶華飛逝，怎算滄桑？
「細個時，真係窮到你唔信。」
她為滿州正黃旗人，父親本是大戶人家，文革爆發，祖母被活生生打死，所有家財都塵歸塵土歸土。父親帶著妻兒逃到香港，最初住銅鑼灣，後來住調景嶺木屋區。她有八兄弟姊妹，頭幾個賣斷了學京戲（包括四哥惠天賜），養少一個得一個。
「中秋節先見家姐阿哥一次，有年爸爸唔知響邊搵到個五仁月餅，我哋一家十口分，每人搣少少，已經係正餐。
「平時，等酒樓打烊，後門會有餸頭餸尾執。」
惠英紅一家，都是天主教徒。
「因為每個月有奶粉、油同麥片派，個個細路都去洗禮。」
四歲，就到灣仔一帶酒吧謀生，拿香口膠、裸女啤牌、雙喜牌筷子叫美國水兵買。那時，已知道甚麼是生存之道。演技，大概也是那時開始培養。
「我好識睇人眉頭眼額，邊個水兵孤寒，邊個肯俾錢，通常睇得啱。其他細路賣到十蚊，我有本事叫你幫襯我買廿蚊。」
點叫？「我口才好，(lur)到你買為止。」
一個月可賺一、兩百元，幾歲人仔有本事改善一家人生活。那時的惠英紅，應該長得標致吧？在紅燈區打滾，想起都有點心驚膽跳。
「幾靚㗎，滿州人輪廓深，由細到大都俾人話似鬼妹。
「水兵好壞咩？又唔見得，反而覺得佢哋好可憐。好多嚟香港一個禮拜，見過我兩三次，臨走時一定喊，因為去到越南，好可能戰死。」
童年時代，已見盡最赤裸人性。她親眼見過道友嘔白泡橫屍街頭；也目睹妓女被嫖客捅了幾刀慘死……
「見得愈多，反而愈單純，起碼我一定唔會掂毒品，唔會亂搞男女關係。」
太過洞悉世情，惠英紅手上假如多根香煙，眼前這副「往事只能回味」的構圖，幾近完美。
「煙，早幾年戒咗啦。」

機會主義
十二歲，惠英紅上午讀書，下午轉到美麗華夜總會跳中國舞。三年後，被張徹導演看中成為邵氏演員，月薪五百。第一套電影，是七七年的《射鵰英雄傳》，演穆念慈，戲里戲外皆命苦。
「唔苦，拍戲有人斟茶遞水，有飯食又有宿舍住，原來係世界上最舒服嘅工作！」
七九年，第一套動作片《爛頭何》，原本只是行行企企的妓女，因為神似，結果被劉家良「升」為女主角，片酬加到一萬。
「演戲根本係演俾導演睇，導演唔俾機會，觀眾無可能睇到。
「由細到大都知道，唔可以放過任何一個機會。依家啲演員roll 機仲發夢咁渾渾噩噩，見到我會鬧。」
今時今日拍電視劇，沒有自己戲份時，惠英紅會堅持站在一旁看。
「睇下對手點演，萬一做咗啲勁嘢我唔知，我咪被比下去！」
專業，但也好勝，幸而沒有經歷甚麼低潮。十九歲，已買車買樓。
「嗰時仲住宿舍，朋友話黃埔好，就跟住買嚟收租。買車，係買寶馬。」
八十年代食正電影市道高潮，每日至少三、四組戲在身。最高紀錄，廿七日沒回家睡過一覺。
「最癲係《霸王花》系列，呢頭拍撞鬼霸王花，嗰頭又拍乜乜霸王花……亂？唔會亂，因為都係一樣嗰啲嘢，換件衫就得。」
七七年出道的惠英紅，拍過超過六十部電影，十部電視劇集，還有多個港台的單元劇。九○年以三百萬買匡湖居，九七年以一千萬賣出。生活，一早改善了，養自己，還養活一家。
「拍戲賺嘅片酬，講真，一早使晒。但其他投資都幾好，我

人有

福。」

等待老伴
錢是不愁了，女主角獎也一早拿過了，至今仍和媽媽同住，惠英紅缺的，只是身邊那個人。有關她的戀情不多，劉家良，永遠是她口中的是恩師，不過礙於對方妻室，早已不便再提。程小東，給她最大關懷，至今仍是朋友。黃子揚，唯一承認的圈中男友，惠英紅曾用「劫財劫色」來形容，是她最大污點。
「男人最緊要有志氣，無錢唔緊要，你唔一定要養我，但千萬不能心存我養你。」
孑然一身，惠英紅再強，也不過是個普通女人。
「每個女人最終願望，都係希望有個伴。有老公當然係最好，但唔敢期望太高，『伴』得㗎喇。」
此刻的惠英紅，終於流露一絲絲溫柔。
「睇相佬話我有八十歲命，將來一定會有個老伴。都好，人愈老先愈需要伴侶，到時真係可以執子之手，與子偕老。」

女人
女人沒有男人，可以有很多原因。
一命二運三風水，可能是命運如此，也可能性格使然。
「以前，就係強得滯，結果俾人飛咗。後尾學做波斯貓，但男人好衰格，太過倚賴，好快又搵第二件……」
叫惠英紅踢腿翻觔斗，可能易過嬌嗲地做個小女人。正如今天叫她穿裙子，老是不自在。
「影完未？得喇呵……」踏著四吋高踭鞋，飛快的跑去換衫。
我看到的，倒是那個五呎六吋，一百零二磅的苗條身影。
「個個都話我真人靚過上鏡。」
上天，點都係公平嘅。