自揭新歡底郭羨妮戀尖嘴偉仔
沉寂一時的郭羨妮，日前在台慶頒獎禮上穿上中門大開的性感晚裝，艷絕全場成焦點。昨日又有報道指她電爆「通菜街林峯」，她表示男方是單身漢，大讚他說：「佢個樣似梁朝偉，把聲似張國榮。」
郭羨妮去年因為搭上有婦之夫陶大宇要避走加國過冷河，她表示仍很想拍拖，但堅稱要搵圈外人，昨日有報道指她約會「通菜街大少林峯」，電爆對方，又同車返香閨。
肯定非第三者
曾傳緋聞的馬德鐘（左）和郭羨妮昨日在台慶拜神時，甚為避忌。
昨日郭羨妮在將軍澳電視廣播城出席《萬千星輝賀台慶》拜神時解釋說：「係普通朋友，朋友約食飯，已經識咗幾年，係女性朋友介紹，佢哋已經結晒婚，所以介紹畀我。我已經問過佢冇女朋友，佢身邊朋友我都識，已經起晒底。」男性友人被指是通菜街林峯，郭羨妮即刻解畫說：「唔似，佢個樣似梁朝偉，把聲似張國榮，係真㗎，我哋有一齊去唱K ，不過唔好叫佢通菜街，好肉酸。」莫非是山頂梁朝偉，她笑說：「咁佢又冇咁有錢，尖沙嘴喇。」
穿性感裝尷尬
郭羨妮表示頒獎禮當晚已知影阿姐時會拍到其胸部，令她十分尷尬。資料圖片
雖然頒獎禮無緣嗱獎，郭羨妮深明搶鏡之道，一身中空性感晚裝，令全場嘩然，日前在台慶頒獎禮坐在汪明荃後面，而鏡頭又不時對準阿姐，故其透視胸常在鏡頭前出現。郭羨妮前晚在電視城綵排時說：「我現場睇電視都知，所以有時用手遮吓又拍吓手，避得都避，好尷尬嘅。」對於無線近期將緋聞男女藝員擺上枱宣傳，令沒有緋聞的楊怡未成話題人物，她即笑指曾經與吳卓羲傳過緋聞，於是她飛撲埋吳卓羲身邊，十分搞笑。採訪：胡比、楊潔雯攝影：陳俊強
郭羨妮前晚為台慶綵排時，拿著中國扇起舞。
