林欣彤（Mag）憑靚聲大受歡迎，唱歌拍戲拍劇工作不斷，昨日她首次出埠公幹到台灣拍劇，其母為她執行李竟烏龍拿錯自己的護照給女兒，阿Mag在機場發現後嚇到面青，要母親立即拿護照衝到機場救她。阿Mag頻向大家道歉又怕阻礙行程，幸好只是有驚無險的小風波。
林欣彤獲無綫力棒，忙到唞不過氣，還未推出唱片真正展開歌唱事業，便要不停拍電影拍劇。她剛剛才考完試，昨日又起程到台灣拍無綫改編自幾米作品《你們我們他們》的劇集。阿Mag擔任其中一個單元的主角，還會與一位台灣小生合作。
昨日阿Mag清晨便到達赤鱲角機場會合導演及拍攝人員，她帶着一箱行李準備辦理登機手續，拿出護照時才驚覺原來拿錯母親的護照，第一次公幹便大頭蝦，似乎出師不利，阿Mag嚇到面青青，即致電母親問道：「媽咪你做乜畀你本passport我呀？」林媽媽得悉拿了自己的護照給女兒後，即取阿Mag的護照，火速飛車到機場給愛女。
阿Mag笑謂覺得很不好意思，她說：「第一次出去就搞成咁，真係好對唔住大家，我噚晚都有嘢做，所以媽咪幫我執嘢，我出門口冇睇吓本護照，呢個咁大懵嘅習慣係遺傳自媽咪！」
拍完電影又拍劇集，生活相當充實，不過阿Mag最希望就是可以放更多時間在音樂上，她說：「有時間我都想學番一樣樂器，我自己得閒都有試吓作歌，不過我覺得自己仲係唔得。」
阿Mag將會簽約成為英皇旗下歌手，她說：「我覺得邊間公司唔重要，我係幾多身價都冇用，係要我做到，同埋我希望唱片公司可以畀我更大自由度，等我喺音樂上發展。」
from:
http://hk.apple.nextmedia ... art_id=14895055
