傑斯與前威爾斯小姐搞婚外情，以及勾弟婦成為英超熱話，搞到佢周身唔得閒，冇時間去處理脫髮問題，但一波未平，一波又起。英國傳媒日前又爆料，佢弟婦娜塔莎原來係交際花，仲曾經同傑斯一個前曼聯隊友瞓過。究竟邊個係老襟，睇怕傑斯都要爆頭，頭頂嗰啲毛毛隨時又甩多幾條。
37 歲嘅傑斯後生時長髮飄逸，不知幾型仔，但步入中年後開始經歷男人最怕嘅甩頭髮。英國《太陽報》報道，佢由09年6月使咗成1.4萬鎊（約18萬港元），用激光改善脫髮，效果唔錯；不過，由今年2月開始因為忙於比賽，成日唔得閒去做治療；加上近排被性醜聞纏身，更加唔得閒去理三千煩惱絲，受埋受埋唔少壓力，頭髮比以前明顯稀疏咗。如果佢知道埋其中一位紅魔隊友，同弟婦有路，變相做隊友兼老襟，睇怕都會激到頭髮甩多幾條。
性醜聞困擾脫髮嚴重
C朗（右）效力曼聯期間曾為紅魔贏得3屆英超錦標，他是否傑斯的老襟，球迷可自行拆解
另外，英國《鏡報》日前就爆料，話本身係做地產經紀嘅娜塔莎其實超濫，佢除咗背住老公洛尼同大伯傑斯搞嘢，同時亦背住傑斯同一個前紅魔球星有一手。知情人士向該報透露：「娜塔莎濫交係人都知。傑斯知道娜塔莎仲有同佢細佬洛尼瞓埋一張床，但就完全唔知除咗佢哋兩兄弟之外，原來仲有同佢前隊友搞埋一齊。」
小道消息指，同娜塔莎瞓過嘅前曼聯球星有4個特徵，第1係同傑斯合作過100場比賽，其次係贏過3次英超錦標、第3係單身、第4係中場。史高斯同卡域克都同傑斯合作100場同贏過3次英超，但兩人屬已婚一族，而且未離隊；至於約基同埋基斯坦奴朗拿度（C朗）就先後喺02年同09年離開曼聯，而且都係贏過3次英超、同傑斯合作超過100場，兼且仲要未結婚。至於司職中場呢個特徵，約基話晒收山前都踢個吓中場，邊個嫌疑最大，大家自己估下啦。
http://hk.apple.nextmedia ... ;av_id=15326856
但喺謎底未解開之前，我求大俠奉勸傑斯無謂諗咁多，只不過係風水輪流轉啫。諗得多只會甩多幾條頭髮就唔抵啦！
