導盲犬Google去年一月從台灣來港，經過年半的寄養生活和訓練，上星期三終於畢業正式「上班」，往後的日子便要跟視障主人David出生入死。
作為首隻本土訓練的導盲犬，牠很想跟大家分享在香港的所見所聞。
跟幾個視障人士配對，最後導師揀咗David做我主人，將我免費送給他，連狗糧和睇醫生都有贊助。我們一起特訓了一個月，上星期三開記招行畢業禮㖭。
大家好，我是Google，拉布拉多男，快兩歲。只因老豆Super和媽咪Kitty都是台灣最優質的導盲犬，我一出世就注定要工作，不能夠像松鼠和貴婦般嘆世界。
我本來是隻獵犬，跑得快過劉翔，但一開工，就行到蟻躝咁慢，因為要帶住主人David避開障礙物，所以唔快得。好彩主人太太每日早午晚都會放我散步，先有機會飛奔咋。
每次出街都有好多粉絲跟我say hi，但一有人埋身，主人就會派卡片，啲人睇完卡片就彈開，只敢遠遠偷影我。原來張卡片是叫人唔好同我玩，以免阻住我工作。我帶路時，主人為怕影響我，也不跟街坊打招呼，有街坊揶揄他：「依家有隻狗巴閉喇，連招呼都唔打！」其實我接受過導盲犬導師Raymond的嚴格訓練，犯錯要做到啱為止，on duty的時候莫講話在狗群中我都是stay，有人請食嘢都擰歪臉，點會受唔住引誘？
Google成長篇
請看看我如何由傻狗變導盲犬：
剛出世的我，身旁是媽咪Kitty（我似爹哋，他是白色的）。因為協會生到第七胎，所以以G字排名，Google這個名是台灣導盲犬協會改，去年初協會將我送俾香港。
我的小時候，一個月大。
初到貴境，先跟香港寄養家庭生活，帶我去7-Eleven買嘢；到迪士尼玩，坐昂坪360睇大佛，學做正常人。
賊當好人辦
我每日開工三小時左右，帶主人行兩條路線：屋企去茶餐廳和屋企去公園。每當我除下導盲鞍，就知收得工。62歲的主人David是退休人士，識盲人按摩，他在家時會幫老婆鬆吓骨，我都乘機抽水，遞完左手給他按，又遞上右手，惹得他們咔咔笑。兩個女兒都在外國生活，兩老日對夜對，本來鬧交多過食飯。但主人話自從我來了之後，太太黑面都少咗！
雖然大部分人當我明星，但關公亦有對頭人。主人住公屋，我跟房署傾好咗，屋邨內六號花槽是我的洗手間，點知有人投訴，屈我四圍屙。喂！我咁無品就做唔到導盲犬啦！不過我唔嬲，導盲犬鍾意harmony，主人和導師都讚我敦厚穩重善良，在我眼中無好人壞人之分，有賊入屋都歡迎，叫我看門口就死梗！
想當日初到貴境，搭渡海小輪時，有船員當我是貨物要買船飛；電車司機又話同行的導師唔係盲，所以我唔可以上車。到今天，依然有酒樓商場唔歡迎我，上星期搭的士，個的士司機更反白眼藐我㖭！
狗的世界好簡單，聞聞對方屁股就做朋友，希望香港人個個都當我是朋友啦！
David去大快活食嘢，我就趴地等，唔會阻住人。試過坐巴士，邊度有位我就停低，等主人安坐後就捐落櫈底。
香港人多車多，扶手電梯也很多。年初接受特訓時，我在電梯口猶豫好耐，唔知上唔上好，最後搞咗成個月，導師用埋零食攻勢，才令我成功踏出第一步。
David三十年前因視膜網脫落以致失明，一直用手杖。但手杖只能碰到兩步內的障礙，我就可以睇多幾步，仲可以帶住佢坐地鐵入閘！
除下導盲鞍，我即刻「變臉」，飛奔喇！
人類反應：
林太：我都是第一次見到導盲犬，牠好乖，希望香港導盲犬可以普及。
主人David：我未養過狗，起初都怕自己失明照顧不了牠，但受訓時跟牠相處，原來牠好乖好純。我食嘢時牠望兩眼知無佢份就行埋一邊瞓，依家我當佢仔一樣。
