因為要照顧仔仔Torres，足足休息咗四個月有多嘅楊千嬅，上個禮拜三（十月二十四日）終於復工，以代言人身份出席醫學美容中心活動。
咁耐冇同記者見面傾偈，千嬅比以前更加開籠雀，自爆儲定人奶俾B仔，又話生完有升cup，不過減肥後已經打回原形，家陣仲有十幾磅要減，活動當日，千嬅個雙下巴同豪華臀的確遮都遮唔住，搣脂仍需努力。
唔停口講仔經講減肥，但問到佢有冇打俾失婚前老闆黎明，千嬅轉數同生仔前一樣咁快：「我望住個仔，邊度得閒理其他嘢呀，照顧佢大小二便都夠我緊張，人哋家事，我唔批評！」呢條屎橋都俾你諗到，掂！
有傳當年千嬅加盟A Music，同老闆黎明極度唔啱嘴型，10年千嬅同丁子高大婚，黎明直頭冇去飲喜酒！儲夠人奶俾個仔，千嬅終於可以歎番啖香檳。
