【今日我至閒】懷孕四月嘅蔡少芬前日推住歲半嘅囡囡小湯圓行商場，囡囡一邊坐車一邊食餅。
■張晉同Ada出年又準備迎接另一粒湯圓出世。
【又一城】上月公佈懷胎三個月嘅蔡少芬（Ada），前日下晝兩點鐘同老公張晉、囡囡張楚兒（小湯圓）去咗又一城行街睇戲。素顏嘅Ada同老公先去到售票處買飛，喺BB車瞓覺嘅小湯圓就交咗畀同行嘅一名中年婦人湊。買完飛冇耐，張晉就獨自行開咗一陣，Ada就去咗買兩副立體眼鏡，準備入場睇《少年Pi的奇幻漂流》，買完眼鏡後都唔見張晉返嚟，而場戲亦已開始，見到Ada等到好心急，到開咗場大概10分鐘左右，先見張晉返嚟同老婆入場，交低囡囡畀同行嘅中年婦。
兩公婆入場之後，中年婦帶咗小湯圓去側邊嘅溜冰場等，呢個時候小湯圓已經醒咗落地行，當現場播起hit歌《江南Style》，小湯圓就好熟練咁跳馬舞，好鬼得意。
【一家三口】
【凸肚抱抱】
■兩公婆睇完戲，囡囡一見媽咪即刻要抱抱。
【懷孕四月】
■再懷孕嘅蔡少芬腹部隆起。
見父母即扭抱直到下晝4點半散場，Ada兩公婆出嚟，小湯圓離遠見到父母即刻伸出雙手要抱，已見肚嘅Ada亦一個箭步抱起囡囡逛商場。奇怪地張晉一出場又離奇失蹤，可能係煙癮發作，大約五分鐘後佢哋再會合，一家幾口去咗睇衫，行咗10分鐘後就落停車場攞車離開。
