張栢芝和謝霆鋒的五年婚姻前年玩完，過氣夫婦從此各行各路，霆鋒專心搵銀養家，而32歲的失婚栢芝日前接受訪問時竟風騷自爆追求者眾，更豪語形容自己是離婚離得最開心的女人，即使過往做錯事也從不後悔。兩子之母栢芝期待第二春，現時雖未覓得另一半，卻已揚言恨生女。
栢芝昨晚應好姊妹范瑋琪（左）邀請到紅館任其演唱會表演嘉賓。
張栢芝前年8月跟結婚5年的謝霆鋒離婚，有指兩人婚變的導火線是栢芝前年5月到台灣出席台灣藝人好友范瑋琪和陳建州婚宴，翌日返港時在機艙撞正08年淫照男主角陳冠希（Edison），當時栢芝向空姐要求調位跟Edison同坐，還主動與Edison用手機自拍。栢芝日前接受now觀星台區永權主持節目《栢芝MaMa AuPaPa》訪問，她不但風騷自爆是離婚離得最開心的女人，還強調自己是想做就去做的人，即使做錯事也從不後悔，該節目今晚8時播出。
恨女：一嚟即刻生
栢芝想當年排除萬難才跟霆鋒結婚，婚後育有兩子Lucas和Quintus，幸福之家前年卻驟變破碎家庭，外間一直以為離婚對栢芝造成很大打擊，但回復單身的她自爆是離婚離得最開心的女人，她在訪問說：「從中學到唔少嘢，覺得冇乜嘢係必然，活在當下，所有承諾都係眼前假象。」早前霆鋒自爆頭皮生皮膚癌，遂將病情告知前妻栢芝，栢芝卻向他說上天不會讓衰人早死，栢芝此時又用開心來形容離婚後生活，擺明寸爆與霆鋒的五年婚姻為她帶來枷鎖和壓力。
曾捲入淫照風暴的栢芝又表示不會為過去所做的事後悔，她說：「每個人都有做錯嘢，當初你做嗰刻係你好想做先會做，所以唔好後悔。我都有唔開心時候，夜晚喊一陣，第二朝瞓醒又重新嚟過，試過匿埋廁所，好似baby咁攬住自己喊出嚟，冇聲淨係流眼淚，驚啲仔聽到。」
現年32歲的栢芝自爆離婚後不乏裙下之臣，早前被拍到與大隻新歡睇演唱會的她說：「靚仔？身家？唔要！我成日畀人錯覺鍾意靚仔，根本我鍾意心入面，心靚。」已有兩子的她現況冇拖拍卻恨生女，她直言：「我想生女，等個天，如果天要嚟嘅話就嚟，出去識男仔我唔會囉，我未搵到個OK嘅對象，可能突然間就出嚟……我指生女，唔好煩，唔好再拍拖、離婚、分手，一嚟即刻生。」
區永權帶埋兩子做節目，栢芝坦言現時不想拍拖，只恨生女。
栢芝前年在機艙巧遇陳冠希，二人自拍泯恩仇，卻成為栢芝離婚導火線。資料圖片
「Lucas知父母離婚」
有指五歲長子Lucas不時出招撮合父母復合，栢芝說：「Lucas開始知道父母離婚，細仔未知，唔好搞啲小朋友，佢哋要知，慢慢解釋佢聽，離咗婚嘅單親家庭，媽媽有日同另一個uncle結婚，生咗個細妹。咁都OK，我家姐（戴碧芝）唔係我親生爹哋生，但我都當佢係我親生家姐，可能我經歷過呢啲嘢，我覺得細路仔係你教佢，解釋佢聽，如果小朋友問你嘢，你唔識答就唔好答。」
栢芝的離婚某程度與范范有關，但無損姊妹情。范范昨晚在紅館開騷，栢芝撐場合唱《可不可以不勇敢》，范范說：「這首歌是我最想跟她說的話，認識她10年，即使遇到最shocking的事情，她頂多眼淚在眼眶打轉，尤其在孩子前，她要扮堅強媽咪，好心痛她。」又勉勵栢芝說：「有時候真的希望你不勇敢一下，沒法承擔時，我們的肩膀可以給你依靠。」
記者昨日致電區永權，他大讚栢芝率性，鏡頭後也有交流湊仔經，他說：「栢芝話佢有畀李小龍網上嘅片畀Lucas睇，栢芝覺得眼神好緊要，同人傾偈一定要有目光交流，佢話最初以為Lucas學爹哋鍾意李小龍嘅動作，點知Lucas好快get到媽咪個意思，佢都鍾意李小龍嘅眼神。」
栢芝和霆鋒離婚後，不時帶着兒子聚天倫，但原來栢芝離婚離得很開心。資料圖片
失婚的栢芝不乏追求者，最近便傳出她有大隻新歡（箭嘴示），兩人早前還結伴睇草蜢和軟硬演唱會。資料圖片
From:
http://hk.apple.nextmedia.com/entertainment/art/20130114/18133104
