電影公司開戲當然會益自己人，好似呢套《古惑仔》，王晶旗下藝人莊思敏亦有份參演。
媽咪姐收到風，原來莊思敏同王晶已經結束賓主關係。不過塞翁失馬、焉知非福。話說早前同屬王晶旗下嘅謝婷婷，因不滿王晶力捧國產妹童菲而劈炮，仲帶埋成個經理人部門走，搞到堂堂拿督女莊思敏冇人服侍之餘，仲要自己接job。
今次莊思敏唔再為王晶效勞，可謂無約一身輕。佢同媽咪姐講：「我同晶哥合作得好開心，唔續約都係想諗清楚發展方向啫！嚟緊呢幾個月會自己做埋經理人，力不到不為財吖嘛！」啱㗎嘞，國產妹咁進取，我哋香港人梗要自救出路！
媽咪姐早前喺中環撞到莊思敏，當日佢行色匆匆，唔知係咪趕住搵新老細呢？家陣莊思敏冇經理人，於是就自己同太陽眼鏡品牌「Oh My Glasses」傾合作。莊負責設計，賣到一副都有佣抽。
有傳婷婷不滿王晶開咗呢套爛片俾自己做女主角而怒走，戲名英文叫《Naked Soldier》，中文名係《絕色武器》，個名又爛得幾絕嘅！
