王家衞的《一代宗師》大收，令葉問故事再度炒熱。宇宙最強甄子丹決定今年中執多轉，接拍第三集《葉問3D》。
葉問唔打唔得，靠演技的朝偉打到斷手，備戰一年，瘦身二十磅演晚年葉問的黃秋生，在《葉問終極一戰》亦打到飛起，任由對手曾志偉自度招式，施展醉拳堅打。
宿醉跌三次
五張黃秋生飾演晚年葉問，埋位前做足準備，減磅學佛山口音，又搵葉問兒子葉準師父，攞料做定功課，做到形神俱似，但拳拳到肉對打場面仍不能缺，有大聖劈卦底的他，搵定葉問徒孫冼國林先學了一年詠春，不過面對戲中耍白鶴拳，武師出身的曾志偉時，依然被打到手腫。
據知，拍攝一場梅花樁舞獅戲前，曾志偉在香港做完大騷，於慶功宴被隊到啤啤full，才連夜出發到佛山，準備第二朝一早開工。由於宿醉，志偉在木樁上企唔穩腳連跌三次，但拍慣喜劇，近十幾年已經唔多郁的他，依然堅持真身上陣，直落埋位十三粒鐘；跟黃秋生對打時，曾志偉更加投入，臨場度招。
洪天明跟蔣璐霞雖然不懂詠春，但都有武功底，二人在戲中扮演葉問徒弟，也要由頭打到尾。
身為監製兼武術導演的冼國林（右一），在六十年代舊香港街景片場跟黃秋生大玩黐手。袁詠儀在戲中扮演葉問老婆張永成，葉準認為是眾多女星中，扮阿媽最靚的一個。
黃秋生瘦身二十磅做晚年葉問，無論髮型、神態都極為相似。
近日人氣急升的王祖藍，在戲中客串做算命師父。
要搽跌打酒
「我都估唔到佢（曾志偉）咁勁，成六十歲人，平日又忙又飲咁多酒，但身手仲好犀利，動作比我想像中快，拳拳有力，我俾佢打到腫晒，要搽跌打酒消腫。我哋有場對打戲係志偉臨時要求加上去，雖然高度同我差一截，但佢度得好好睇。」黃秋生事後大讚。
真打無眼，戲中做徒弟的陳小春，跟臨時演員對打，更被摑到面腫，但他完全冇叫停，一take過搞掂。至於學過詠春的阿嬌（鍾欣桐），在戲中跟武術冠軍周定宇過招，亦有板有眼。個個演員硬食，無欺場。
飾演葉問徒弟的阿嬌，亦要在戲中玩黐手，打番幾場。拍這場在梅花樁上舞獅戲，雖然有威吔吊住，曾志偉在木樁跌落地三次，但堅持要親身上陣。
金樓VS舊香港
王家衞手上的《一代宗師》，以葉問前半生故事為主，重頭主景金樓，由美指張叔平花兩年時間堆砌而成，金樓樓梯扶手用金箔包住，更有真古董做陳設，成為電影亮點。
《葉問終極一戰》以葉問離開家鄉佛山，到香港開館授徒，下半生的艱辛事跡為骨幹，戲中呈現舊香港五、六十年代街景，包括早已拆卸的九龍城寨。
