謝霆鋒和房祖名早前被撞破到中環睇商廈傾合作，祖名事後直認有合作計劃。前晚兩人又再聚會食法國大餐，更約成龍、狄波拉以及老友陳奕迅等。離開時，霆鋒與成龍於街頭攬完又攬，依依不捨地告別，事後成龍說：「總之後生仔做正面嘢，我哋做父母梗係支持！」
臨走前，霆鋒（右）Chok行甫士與成龍握手道別。
老友鬼鬼的謝霆鋒和房祖名，近來有意兄弟同心合作賺大錢，早前被《好報》獨家撞破結伴於中環睇商廈，事後祖名直認有睇舖兼有合作計劃，不過一切仍屬初步。前晚十時許，祖名於微博上載一張和霆鋒食法國大餐照片，見霆鋒穿白恤衫赴會，看來對是次聚會非常重視。一行人飯後再轉場暢飲，至凌晨二時，記者於中環發現兩人正在離開，身邊更是星光熠熠。
握手攬攬傾唔停
最先步出的祖名一身便服打扮，穿得相當隨意，一臉笑意盈盈，身後即見其父成龍，另有拉姑和鬍鬚Kong，尾隨便是官仔骨骨的霆鋒，同行更有陳奕迅（Eason）。一行人於街頭依依不捨道別，其中成龍和霆鋒最「黐纏」，兩人握完手又擁抱，攬完又攬相當熱情，成龍攬實霆鋒似有很多說話要講。其後祖名亦上前和霆鋒攬攬道別，一行人於街上擾攘一輪終各自上車離開。
祖名率先步出，其他人緊隨其後。祖名（右）與霆鋒站在街頭密密斟，似商量生意大計。
昨日記者致電成龍，他直言回港數天。提到前晚聚會，他說：「祖名霆鋒約食飯叫埋我，仲叫埋拉姑同陳奕迅，開心吓！（佢哋係咪傾合作投資呀？）都係傾吓拍戲、投資咁！冇聽到佢哋實際嘅合作計劃，總之後生仔做正面嘢，我哋做父母梗係支持！」
陳奕迅大讚霆鋒是出色的企業家。
平日打扮隨意的霆鋒穿白恤衫赴會，可見他相當重視飯局。成龍與霆鋒攬到實唔願走。
Eason唔敢炒商廈
亦是座上客的Eason昨日在電話中說：「純粹見吓面吹吓水。（霆鋒、祖名係咪傾地產大計？）我唔知。（你有冇份投資？）我冇，我愈食愈肥。」問可有興趣投資地舖、商廈？他搞笑說：「我冇咁嘅資本，成幢大廈喎！一來我好穩陣，同我身形一樣穩重。」他大讚霆鋒是年輕企業家，笑言大家級數不同，並指政府刊物曾公布霆鋒是近十幾年來五十個最成功企業家之一，認真威水。Eason續稱寧願投資自己的音樂工作室，興趣是培育發展下一代：「但簽咗人返嚟，人哋嘅事業要諗清楚，唔可以草草了事，好大責任。」
from:
http://orientaldaily.on.c ... /00282_007.html
