導演劉偉強噚日53歲牛一，每年佢都會相約一班好友到西貢匡湖居遊艇會慶祝生日，噚晚馮德倫、張達明、萬綺雯夫婦、余文樂、張家輝及張學友等都畀面到場。
劉偉強傍晚6點幾出嚟話年年都搞生日會，唔少朋友都有畀面嚟，好似請咗黎明咁，至於有冇請埋舒淇時，劉偉強就話冇，不過舒淇就喺微博賀佢牛一，仲暗示前日已經同導演食飯慶祝咗，而黎明嘅經理人陳善之到場時就話黎明唔到，唔知係唔係怕被人追問前妻樂基兒再婚，又怕同舒淇新歡馮德倫同場。至於馮德倫就話要祝導演年年有今日，問到佢係唔係代舒淇嚟，佢就否認，又話唔知點解對方嚟唔到喎，不過提到舒淇時佢就笑咪咪。
之前患癌暴瘦嘅張達明噚晚拖住一對仔女精神奕奕嚟到賀。
壽星公劉偉強每年生日都請一班老友嚟開party。去年黎明都有嚟到賀，今年冇影，唔知係唔係怕被追問樂基兒嘅新聞。
想搵接班人
而劉偉強話今年生日願望都係希望大家身體健康，又話想拍戲拍到70歲，仲想搵接班人，至於係唔係好似李安一樣喺奧斯卡上為台灣爭光，佢都話：「我想拍多啲好戲，都想為香港爭光。」劉偉強太太同仔女都有到場。
此外，拖住一對仔女到場嘅張達明精神相當不錯，對於現時嘅身體及健康狀況，佢就以OK同多謝嚟回應。
而舒淇噚晚又有感而發喺微博留言話：「先懂得愛自己，才懂得怎麼讓別人來愛妳……放手才是對彼此最好的選擇……勇敢說再見，從此不相欠。」似乎暗示分手。
from:
http://hk.apple.nextmedia.com/entertainment/art/20130405/18217038
