郭富城（城城）同熊黛林分手之後，各自展開新生活，甩拖城城時間多咗，噚日去咗珠海國際車場參加「奧迪R8 LMS杯」業餘賽車組賽事。城城好勤力，朝早就落賽車場練習，不過期間發生小意外，佢揸住Audi鏟咗去草地，連車尾都甩埋，好彩個人冇事。下晝進行排位賽時表現得好出色，攞第三名，城城即開香檳慶祝。
城城好緊張睇番自己啲成績，最快圈速係1分38秒，城城話可以再好啲，佢話：「今朝撞車時真係竧竧哋，打咗呔盤一下，未達理想車速，希望聽日會再好啲！第一同第二名都係好好嘅業餘賽車手，希望多啲同佢哋切磋啦！」
肥苟（左）同李亞男風雨同路齊血拼，感情真係好喇。
城城落場比賽，信心十足！城城攞第三名，梗係要開香檳慶祝啦。
手袋隨處擺
至於被指介入「富黛戀」做小三嘅無綫小花苟芸慧，一於懶理是非，前日同好姊妹李亞男行孖咇掃靚鞋，唔知肥苟係想着新鞋踩小人，定係要踏出新一步？前日下晝5點幾，兩位高妹相約去銅鑼灣濕平，不約而同戴住帽，肥苟仲紮住孖辮兼戴黑膠框眼鏡賣萌。佢哋先入咗一間減價鞋店，門外櫥窗貼住買二送一嘅優惠，佢哋不停喺貨架係咁揀，隨手就放低手袋喺梳化，專心低頭試鞋，其實咁樣放低個手袋，有啲唔安全喎。最後佢哋揀咗成40分鐘，大有收穫，仲各自去畀錢。
肥苟同李亞男分別拎住戰利品離開，雖然外面落緊雨，不過佢哋繼續興致勃勃，仲蹺晒手往下一站。其間佢哋分別玩手機，然後又出發去名牌鞋店掃開倉貨，女人為咗掃貨，原來真係有無窮無盡嘅精力！
李亞男掛住試鞋，肥苟就專注四圍望，手袋呢？咪攤埋一邊冇人理囉！肥苟烏晒身試鞋，好明顯唔記得自己着緊低胸衫。
from:
http://hk.apple.nextmedia.com/entertainment/art/20130505/18249412
