去年12月曾志偉為維持娛樂圈和諧而涉嫌掌摑黃浩，最終被落案起訴，本月須第4度返警署報到。娛圈唔太平，家事更加亂。其新抱Renee（張可蕙）被揭在網上爆粗狂數夫家，有傳嬲到震的志偉為免在應付官司期間添煩添亂，已將國猷和新抱逐離家。
家嘈屋閉鬧劇搬到facebook上演，揭破志偉一家幸福外衣下家宅不寧，亦盡顯Renee的XO港女本色，既要嫁得好住大屋使工人要錢要歎又要老公型英帥。婚前喜愛夜蒲獵金龜的她，自與夫家不睦後即回復本性，在志偉大壽派對上公然姣勾老爺兄弟苗僑偉索吻合照。看來大罵老公死肥柴嫌對方樣衰戇居的她，出口並非一時意氣！
(第808期《東方新地》)
去年9月曾國猷與Renee奉女成婚，婚後三口子不時晒幸福，豈料溫馨表面得個殼，Renee港女本色現形，網上狂數夫家，用詞相當冇品，除粗口橫飛，又攻擊老公外形，稱他「死肥柴」戇居、樣衰，奶奶則「更年期無理取鬧」。
唔騷夫家狂黐型男
事實上半年來Renee與夫家關係已勢成水火，4月初曾志偉60大壽錄影，曾家齊心現身會展，表面無異樣，節目完畢後轉場到西環「尚品薈」繼續狂歡，由於屬私人派對，場內無記者，Renee回復「真我」，甚少騷曾氏一家，與奶奶更加面左左，反之對待志偉眾老死如譚詠麟、苗僑偉、方中信、謝天華等積極埋手，回復未嫁時蒲女本色，當中只有女人湯圓苗僑偉肯應酬她。有目擊者指，被三哥迷到暈陀陀的她，懶理三嫂在場，幾杯到肚不停撩對方猜枚劈酒合照。
「Renee成晚死纏三哥，係咁讚三哥靚仔有型，又話要錫三哥影合照，電到三哥陀陀擰，咁啱三嫂(戚美珍)行開咗同朋友傾偈，三哥又飲到high high哋就主動錫Renee，當錫啖個細姪女啫！」目擊者指由於現場人多兼烏燈黑火，睇到此幕的人並不多，奶奶宋麗華是其中一個。散場後宋麗華雖與國猷夫婦同乘一車歸家，但奶奶全程對新抱黑面相向。成功獲三哥賜吻的Renee事後不時向密友展示勝利合照。
專獵富二代國猷中伏
33歲的Renee出身大圍屋邨，婚前任職化妝品sales，喜愛夜蒲獵有錢仔，但次次迫婚不成便遭拋棄。前年國猷在夜場邂逅Renee中伏，相識兩個月搞出人命，去年5月誕下女兒曾詩雨（Ashlyn），同年9月奉女成婚。
比兒子精明得多的曾志偉，當初已對Renee印象麻麻，但有餡大晒別無他法。知情者指︰「拍拖冇耐Renee已經搬咗入志偉銀線灣屋企，當時佢大緊肚，曾家好遷就佢，Renee為免婚事有差池，亦都聽聽話話，當時尚能夠融洽相處。」
直至9月結婚後，加上有女在手，Re n ee已原形畢露。一心以為嫁入曾家印印腳做少奶奶的她，發現事實並非想像中一回事，開始諸多不滿，埋怨湊女辛苦、奶奶難頂，經常向國猷開火，曾國猷不勝其煩，常以工作為由早出晚歸，假日都冇影。Renee再惡亦未敢向老爺奶奶發難，一口怨氣便在facebook及親子王國上宣洩。
志偉千萬開舖
Renee在facebook講到明嫁給曾國猷全因佢老竇係曾志偉、貪曾家有大屋有工人，又自爆早已花光志偉所給的一百萬，堪稱港女中的XO！據知Renee與國猷拍拖不久已辭去sales一職，做全職曾家婦，誕女後又心思思想搞化妝品生意，不斷慫恿國猷叫志偉打本千萬給她，引入護膚品牌開舖，最後僅到一百萬在網上代理減肥機及減肥膏，但由於經營不善冇錢賺，再慫恿國猷索錢不果，便日鬧夜鬧老公搵唔到錢。
兒、媳逐出家孫女留大宅
志偉對家宅不和一事故作輕鬆，實則嬲到震。「志偉要應付官司已經夠頭痕，冇時間同個新抱同仔算賬，但依家睇見個新抱就眼火爆，已經叫咗佢兩個搬去第二度，由得佢哋打死罷就，但唔可以帶走孫女Ashlyn，怕佢哋嘈起上嚟嚇親B女。」
三哥怒斥「不實報導」
苗僑偉得悉有關報道後在微博說：「不實報道。」他之後接受電話訪問：「這是失實報道，我記得影這張相是生日會，惜個世侄女毋須大驚小怪，我成日在喜慶場合，例如婚禮，都會惜新娘、好友，這是社交禮儀。偷用別人的照片，還寫這種標題，真係賤格！」三哥不諱言也有錫過梁靖琪同契女，問到會否日後避忌一點，不要太Open？三哥話：「我行得正企得正。」至於志偉被爆家醜，三哥笑好友行走江湖幾十年，這些「濕碎料」他應付自如。
