無綫為咗挽救墮崖收視，專登搵咗曾志偉撻朵監製新劇《Aerobic Girls》（暫名《舞室保衞戰》），打人情牌請嚟一班八、九十年代女星出山做女主角，包括李麗珍、葉蘊儀、李若彤、袁潔瑩同張慧儀，仲有無綫自己友江欣燕以及陳慧珊。
七大中女坐鎮，上個禮拜四（六月二十日）仲搞咗佢大型發布會。雖然夠分量，但高清年代嘅今日，李若彤無可能扮番姑姑，李麗珍再唔係蜜桃成熟時，為咗溝淡啲，志偉另外再搵多七位少女扮演佢哋嘅年輕版，分散觀眾注意力。
數數手指，七個之中年紀最大嘅係47歲李麗珍，最後生係話自己39歲嘅李若彤，要佢哋出山拍劇，救唔救到收視未知，八珍覺得最緊要係執執個樣，救咗佢哋塊面先。
志偉吹雞，七女一call即到，但個個年紀有番咁上下，加上又係抄韓劇，真係可以救到收視？
春青係唔係人為，呃唔到人，你睇47歲李麗珍嘅笑容，同21歲嘅王敏奕相比，唔使我形容。
李若彤話第一眼見到「邦民女」陳嘉寶，就覺得對方對眼同自己好似，旁邊嘅曾志偉補充，因為劇中李若彤花名叫洗衫板，所以兩個連身材都似，李若彤嬲到出手打曾監製。
