胡定欣、王浩信大前日下晝喺觀塘拍無線新劇《貓屎媽媽》一場咀戲，嗰日大熱天時王浩信仲要著曬西裝圍埋頸巾拍，所以見佢不停咁流汗，當為場咀戲試位時，王浩信成塊面都滴緊汗，定欣都忍唔住笑佢，不過定欣同王浩信合作無間，唔單止唔嫌棄，仲好有默契，完全冇尷尬，試咗位七次，真咀三次就搞掂。
定欣喺戲裡面同王浩信由細識到大，知道王浩信暗戀自己，但佢又唔多鍾意王浩信兼且王浩信同「細細粒」陳嘉佳係一對，所以一直冇拍拖，點知嚟到結局細細粒知道王浩信心意，主動退出成全佢哋，造就咗呢場咀戲。
王浩信同胡定欣合作無間，拍咀戲前唔使同老婆陳自瑤備案。圍埋頸巾嘅王浩信流到成面汗，要工作人員係咁幫佢抹，定欣都忍唔住笑。
定欣：錫慣曬！
其實定欣同王浩信之前喺《刑警》同《戀愛季節》都係做情侶但冇結果。定欣話：「啲粉絲好想我哋有好結果，嚟到第三次終於有喇。」既然咁好，會唔會嚟個法式濕吻呢？定欣笑住話：「係溫馨嘅吻，我同王浩信已經好有默契，放心。」使唔使做嚇準備？定欣笑言：「唔使，錫慣啦！錫到好自然，有安全感，唔使搞咁多嘢囉。」
嘩，定欣講到錫到慣曬，王浩信老婆陳自瑤會唔會呷醋㗎？使唔使備案呢？王浩信笑言：「上一套《戀愛季節》都有咀戲，但冇鹽花，唔使備案，佢都係演員，絕對明白，佢會明白最緊要好睇。」
大熱天時王浩信仲要孭住件老西，確係辛苦。定欣拍完《貓屎媽媽》後，又忙住為《衝上雲霄II》宣傳。
from:
http://hk.apple.nextmedia.com/entertainment/art/20130709/18327498
