黎明劉公子上身溝冰冰

黎明劉公子上身溝冰冰舒淇忙拍戲，舊愛黎明就有兩年冇拍戲，直至最近喺由寰亞投資、范冰冰孭飛嘅內地電影《一夜驚喜》客串，戲中Leon飾富貴公子，對范冰冰展開猛烈追求。

睇吓Leon呢身Givenchy竹葉西裝造型，再加埋副眼鏡，係咪好似一個人呢？之唔係之前被告非禮及恐嚇男藝人嘅「劉公子」劉定成囉！不過戲中Leon對男仔就冇興趣，而除咗范冰冰、黎明外，套戲仲有李治廷同美韓混血型男Daniel Henney。咁多嫩口靚仔，照計冰冰唔會揀黎公子啩？

Leon喺戲中客串「陸大虎」一角，但論造型絕對搶過一眾男演員。起碼未見過一向斯文靚仔嘅佢咁騎呢呀！

衣着俗氣，面上仲有大粒癦，對黎公子嚟講算好大犧牲㗎喇！

26歲李治廷喺戲中飾演24孝男友，為照顧女友可以工都唔返，同31歲范冰冰有唔少對手戲。

《一夜驚喜》由范冰冰、李治廷、Daniel Henney及蔣勁夫孭飛，一睇就知係盛女愛情喜劇，香港就未知幾時上映。

你精我都精，飲杯竹葉青！（設計對白）
劉公子最愛名牌Givenchy，入獄前後依然熱追，估唔到黎明嘅品味同劉公子咁相似。