郭富城跟熊黛林（Lynn）的七年情玩完，現年47歲的城城被指搭上23歲內地藝人新歡葉熙祺，據知近日葉熙祺和媽咪來港遊玩，再度攻城成功，獲城城「私有化」招呼進駐城宅。昨日升呢做新城嫂的葉熙祺穿透視deep V，勝利出巡力谷32B事業線，她坦言跟城城互相關心，全程表現風騷高調宣示主權。
桃花旺盛的郭富城撇甩熊黛林後，短短數月已有新歡上場，曾跟房祖名傳秘婚的內地新人葉熙祺，上月被發現來港焚城30小時，之後即傳出城城力薦新歡拍電影《全民目擊》，雖然最後葉熙祺沒有接拍，但兩人緋聞已經滿天飛。
升呢做新城嫂的葉熙祺，昨在深圳力谷32B勝利V胸風騷出巡。
城城：啱就豁出去
據知近日葉熙祺和媽咪來港遊玩，安排葉媽媽入住酒店，自己就進駐城城居住的大坑嘉園，再度攻城成功。
昨日城城和葉熙祺分別出席活動，城城現身尖沙嘴出席「聯合國兒童基金會慈善跑2013」記者會，傳有新戀情的城城表現風騷，對於好友張智霖在無綫劇《衝上雲霄II》的激情戲，他說：「我激好多，總之啱就豁出去，我好啲，因為單身。」記者趁勢笑他緋聞多，城城醒目封嘴：「唔答。」隨即掩嘴說：「好似衰多口囉，你哋聽我講，我好難得呢段時間單身，以後盡量唔回應工作以外嘅嘢，所以緋聞都唔答。」對於有指葉熙祺來港住他家？城城說：「我唔會答任何嘢，鍾意點寫就點寫。」
【腋下濕晒】
城城昨日在港出席活動拒答跟葉熙祺的戀聞，但全程笑容滿面，腋下更濕透喎！
23歲的葉熙祺比城城細24年，坦言跟城城是朋友，互相關心。
葉熙祺（前）昨在深圳風騷領軍行騷，升呢城嫂地位超然。
時裝設計師何國鉦昨在深圳舉行時裝騷，新城嫂葉熙祺搶盡吳千語風頭。
至於升呢做新城嫂的葉熙祺，昨穿透視deep V現身深圳，出席Dorian Ho2013秋冬時裝騷，風頭力壓同場的林𥧌女友吳千語，問性感行騷的葉熙祺有冇問准城城？她呆了一呆，並以流利廣東話說：「吓，唔使問，自己同意就得。」記者笑指城城是男友，她支吾以對說：「唔……冇咁講過，朋友囉，識咗好耐。」她否認是張智霖撮合，但據知是圈外朋友介紹他們認識。
葉熙祺拒認上月曾攻城，至於近日來港被指獲城城招呼返家住，她語窒儍笑說：「其實嗰日去搵一個香港朋友，但嗰個唔係佢，唔知佢住喺邊。」問朋友是否住城城屋企隔籬？她吞吐說：「係囉。」問葉媽媽覺得城城怎樣？她說：「媽咪冇見過佢，全屋好多人都係佢fans，我細個媽咪都有聽佢啲歌。」記者笑他們是父女戀，葉熙祺說：「我又冇咁諗，男仔成熟啲好，唔似後生仔，辛苦努力得番嚟嘅嘢唔珍惜。」
「我崇拜佢欣賞佢」
黛戀分手不久即高調傳緋聞，似想宣示主權？葉熙祺否認：「唔係，自己好戥佢可惜。」問會否因前車可鑑催城城結婚？她說：「我唔知點答，可能唔係咁一回事，係我崇拜佢欣賞佢之嘛。」問她與城城是否已經一齊？她想了很久才答：「冇喎，好似朋友之間咁聯絡，互相交流工作上嘅嘢，係互相關心。」問焚城報道後有否聯絡？她風騷說：「有聯絡，佢嚇咗一跳，我都係，我呢世人冇可能做小三或小四，問心無愧。」
另外，同場的吳千語着婚紗行騷感覺麻木，指自己今年檔期滿晒，沒計劃結婚，問她是否視林𥧌為結婚對象？她說：「每次拍拖以結婚為目標，因為自己認真。」
採訪、攝影：曾小嘉（深圳）、何慧斯、陳慧安（香港）
新城主：傳與祖名閃婚出位
新任「城」主葉熙祺年僅23歲，擁有一雙水汪汪的大眼睛和驕人身材，有內地宅男女神之稱，去年曾到日本發展，登上日本銷量第一的時尚雜誌《CanCam》封面女郎，獲封「內地蛯原友里」。去年曾傳出與成龍之子房祖名閃婚消息，她接受專訪時指曾與成龍及林鳳嬌吃飯，但遭祖名否認，事後她反指祖名劈腿，仍與薛凱琪交往，令她十分傷心，繼而分手。近日再傳出她到郭富城家中過夜30小時，成功攻城。
from:
http://hk.apple.nextmedia ... 130808/18368496
