自從08年淫照事件後，陳冠希（Edison）差唔多有5年冇再拍電影，主要工作都係登台、出席活動同推廣自己嘅品牌服飾。不過，前日Edison就同曾志偉飲茶，似乎想為復出拍片鋪路。
前日下晝6點鐘左右，Edison坐七人車嚟到銅鑼灣利園商場落車，身邊唔見平時同佢形影不離嘅台灣女友Ann。着住一身潮服、戴cap帽嘅Edison，一落車已經有個女士等緊佢，然後帶咗佢上樓上間Cova餐廳，其間佢發現有記者影相，露出一個不屑樣。入咗餐廳大約15分鐘又見Edison行返出嚟落樓，佢見到記者仲未走表現得有啲不滿，今次唔只嘴藐藐，仲全程用凌厲眼光望住記者。
Edison（右）前日約曾志偉去銅鑼灣飲茶，沿路有傾有講。Edison希望復出幕前頭炮做得最好，所以一直都嚴選劇本。
志偉黑面
Edison原本落樓食煙，正當佢準備點煙之際，曾志偉喺佢身後出現打招呼，原來佢哋約咗見面，之後兩個一齊上返樓飲茶。大約半個鐘後，志偉先行離開，被問到係咪搵Edison開戲，佢笑笑口話：「傾偈啫。」不過當記者問佢劉家良遺孀翁靜晶有冇搵佢幫手向方逸華追債時，志偉即刻黑面好晦氣咁話：「冇呀！」之後上車走人。約5分鐘後，Edison都上返自己車離開。
據知Edison自淫照一事後，依然有唔少電影劇本搵佢演出，但佢希望復出幕前一炮做到最好，所以一直都係挑選當中，今次可能係佢跟志偉自《無間道》系列後，再度合作。
Edison見有記者，面露不悅並低頭避鏡頭。
其間曾志偉同女友人傾嘢，個樣仲好嚴肅㖭。
嘆咗大半個鐘茶，Edison上返自己架七人車離開。
from:
http://hk.apple.nextmedia ... 130817/18382066
