杜如風強嫁偉仔喇嘛傍實

杜如風整日幻想與偶像梁朝偉結婚，早前實行逼婚大計，與「偉仔」前往佛教國不丹舉行婚禮，她笑說：「我喺香港做咗一個梁朝偉紙板公仔，可以分拆三件，方便放入篋之餘，又可以做唔同動作，企、坐同跪都冇問題，方便我哋行禮同影結婚相，哈....，我哋張結婚相都有一大班喇嘛伴住。」

杜如風與「偉仔」穿上當地人傳統結婚服飾，似模似樣。

她笑言自己與「偉仔」也有穿上當地人傳統結婚服飾，她說：「我當自己嫁咗，爹哋媽咪唔使再擔心我嫁唔出。總之我製作認真，全滿足個人欲望。」及後她解釋是為免費電視now的旅遊節目「風行全世界Part3」進行十日的拍攝工作而已。

杜如風與偶像「梁朝偉」結婚，並有一班喇嘛傍實。
from:http://orientaldaily.on.c ... /00282_061.html

偉仔同「閨蜜」吳廷燁（右）食完飯上車離開，偉仔仲除帽露出陸軍裝頭。

梁朝偉近日憑電影《一代宗師》獲提名金馬獎最佳男主角，都算係掃吓黑氣，唔使成日俾啲小三傳聞困擾。其實論偉仔嘅閨蜜，吳廷燁可以話當之無愧，相信兩個人經常有傾心事，日前兩兄弟咪約出嚟食飯交流囉，而偉仔老婆劉嘉玲就去咗巴黎睇show。

密密食密密斟

當日夜晚8點幾，戴住cap帽嘅偉仔揸住佢架Range Rover去到大坑搵咗個街邊停車錶位後，兩個男人就行咗去附近叫隱泉串燒嘅店舖開餐，呢間店嘅串燒好出名，特別係燒海鮮，好多圈中人都有幫襯。兩個大男人一啲都唔姿整，就咁搵咗近門口嘅位就坐。佢哋叫到一枱都係串燒，但就唔覺佢哋有飲酒，其間見到吳廷燁密密食，偉仔就不停喺度篤電話，唔通同男人食飯都要同老婆嘉玲報到？食到中途兩兄弟就密密傾，見到喺好友面前嘅偉仔間中都笑得好開懷。

食完離開嘅偉仔不停玩手機做低頭族。

偉仔行行吓要烏身整褲腳。

劉嘉玲最近去咗巴黎睇show。

微博圖片
兩個人食吓傾吓逗留咗兩個幾鐘，到10點幾至離開。一出到門口着住衞衣嘅偉仔就烏身整褲腳，行到差唔多到架車時佢又整多次至滿意上車，上車後偉仔就除咗cap帽露出佢嘅陸軍裝頭，然後開車離開。

採訪、攝影：徐錦池、梁繼光
from:http://hk.apple.nextmedia ... 131004/18448839