向來以紀律部隊做題材嘅劇集收視都唔錯，加上呢輪電視風雲風頭火勢，無綫開劇都要搞突破，拍咗兩輯《飛虎》嘅監製林志華，明年1月會開20集新劇《再戰明天》，以懲教署人員每日面對甲級重犯嘅故事做題材，劇情會有香港重犯嘅真實個案，演員有吳啟華、徐子珊、黃德斌同高鈞賢等，王浩信、單立文同滕麗名演囚犯，至於黃心穎BB同趙希洛就做懲教署學員。
滕麗名同徐子珊日前喺懲教所實景拍攝新劇《再戰明天》，睇嚟好逼真喎！
心穎BB做啟華個妹
個劇籌備經年，日前去咗赤柱同最新嘅羅湖女子懲教所實景拍攝節目巡禮，其中阿滕嘅故事，講佢喺女子懲教所湊大個仔，期間遇到啲問題。見阿滕抱住個小演員狂喊，子珊係咁相勸，真係好鬼入戲！而劇中本來係懲教人員嘅王浩信，因為犯咗法，最終自己都要坐監。監製林志華噚日喺電話度話：「我哋去咗監獄嘅實景禁區拍，懲教署安排囚犯唔喺監倉，劇組至入倉拍，唔會影響佢哋嘅運作，好少機會喺實景拍監獄暴動場面，我哋今次都拍到！」
心穎BB終於正式入劇組，宅男要留意喇。
吳啟華（左）同王浩信飾演懲教人員，有唔少對手戲。
劇中本來係懲教人員嘅王浩信，最後因為犯法而入獄。
王浩信喺監倉拍嗰時喊唔停，佢噚日喺電話度解釋：「因為喺監倉實景拍，裏面有囚犯嘅物品，入到去諗住如果出唔到嚟、見唔到啲親人就忍唔住喊唔停，扮囚犯嘅演員又話你入嚟就啱，有排玩呀，氣氛好似真監獄咁！」個劇睇落都幾新鮮，加埋有心穎BB飾演啟華個妹，應該吸引唔少宅男捧場。
版主：陳基征
from:
http://hk.apple.nextmedia ... 131028/18482112
