王浩信喺無綫近日播緊嘅劇集《法外風雲》中扮演二世祖宋家耀，終日游手好閒，不事生產，不過現實生活中，佢其實係陳自瑤（YoYo）嘅好老公，囡囡王靖喬嘅好爸爸，王浩信近年受無綫力捧，一劇接一劇，努力搵銀養家。
囡囡乖巧
王浩信同YoYo雖然各有各忙，但兩公婆有時間都爭取家庭樂，靖喬轉眼一歲多，會行會走。一家三口日前中午，趁住秋高氣爽入咗赤柱郊遊，兩公婆戴黑超擋陽光，靖喬就cute爆拎手袋仔。王浩信日前拍無綫台慶宣傳片時，唔小心整親左手導致輕微骨裂，要戴護腕之餘，醫生仲吩咐佢要多休息，嗰日囡囡靖喬行攰咗想爹哋抱，王浩信都寧願辛苦啲用右手抱囡囡，盡顯廿四孝爹哋本色。
一家人行到攰，就揀咗赤柱大街一間露天餐廳食飯，坐低後，王浩信怕餓親寶貝女，即刻點菜，等食期間，唔主張用手機𠱁細路嘅YoYo，索性同囡囡去附近行吓，等到食物嚟齊晒，兩公婆分工合作餵囡囡，靖喬全程乖巧冇扭計，難怪爹哋媽咪錫晒佢。
王浩信同老婆陳自瑤帶囡囡去赤柱玩，早前拍宣傳片整傷左手嘅佢，唔怕辛苦用右手抱女。囡囡靖喬精乖可愛，難怪王浩信同陳自瑤錫到佢燶。
王浩信不停用手機幫囡囡影靚相。
入到餐廳，兩公婆細心餵囡囡食嘢。
from:
http://hk.apple.nextmedia ... 131031/18486485
