郭富城喺《寒戰》雖然有唔錯表現，但今年香港電影金像獎同台灣金馬獎佢都冇提名，聽講佢都有啲失落，不過佢到近年底即攞番個尾彩，前晚佢喺倫敦憑電影《全民目擊》得影帝。由中國電影制片家協會同英國導演協會全力協辦嘅英國萬像國際華語電影節，今年已經係第五屆，前晚喺倫敦舉行閉幕禮同頒獎。
影帝郭富城同影后楊子姍遠赴倫敦領獎。
楊子姍膺影后
最佳男女主角分別由郭富城同《致我們終將逝去的青春》嘅楊子姍奪得，《全》片同時又贏得最佳影片，內地導演薛曉璐就以《北京遇上西雅圖》得最佳編劇、最佳導演，而最佳男女配角就分別係《止殺令》嘅余少群、《致》片嘅江疏影奪得。
身穿Kent& Curwen禮服嘅城城上台攞獎後，心情靚極，佢話：「得獎永遠係一件快樂嘅事，作為演員，一定盡力去演出每一個作品，而最後能夠得到嘉許，係好鼓舞嘅。」噚日城城又喺微博留言話：「勝不驕而敗不餒，每一個獎項也是一份鼓勵，一份努力的嘉許。」
from:
http://hk.apple.nextmedia ... 131120/18515311
