楊冪同劉愷威喺內地領證結婚後，準備下個月8號補辦婚禮，到時會請班至親好友去三亞出席婚禮，聽講楊冪已經有3個月身孕，遲吓劉愷威會安排佢嚟香港待產，所以佢哋兩個想買新婚愛巢，其實之前劉愷威都喺香港有物業，但將來會有埋小朋友，所以佢兩個就諗住喺港島半山再買新屋。
有咗三個月身孕嘅楊冪上月同古天樂喺上海拍廣告。劉愷威同楊冪結婚後，會返香港生B，所以最近想喺香港買屋。
拍廣告禁煙
上個禮拜，楊冪搵風水師喺香港幫佢搵屋，但喺半山睇咗幾間都話風水唔多好，所以仲未買到，楊冪都好心急，想快啲買到合心水嘅屋。為咗專心待產，楊冪呢輪推咗好多戲同廣告，但百事因為一早簽咗約，所以上個月21號佢就秘密去咗上海同古天樂拍汽水廣告，之不過製作組好識做，盡量拍佢行行企企嘅鏡頭，而現場所有人都唔敢食煙，就算紅如古仔，煙癮起都會行開食，唔想影響到楊冪。
劉愷威爸爸劉丹噚日喺電話度話：「咁佢兩個結得婚，係有打算買新屋，但𠵱家仲睇緊，未揀到。」問到楊冪係咪大肚？佢就笑得好開心話：「你哋估吓啦！婚禮由兩個後生自己搞，但假我已經同公司請咗啦！」
from:
http://hk.apple.nextmedia ... 131205/18536835
