經理人跟藝人關係唇齒相依，成龍七十年代全靠伯樂陳自強捧紅，兩人38年合作無間，但突於08年結束賓主關係，當中因由一直成謎。昨日商台節目播出陳自強錄音訪問，過去不時為成龍遮風擋雨的陳自強，竟批評成龍走紅後「走火入魔」，陳自強言語間又暗示被人迫走。陳自強離場，成龍大小事務即由其妻林鳳嬌接掌。
七十年代寂寂無聞的成龍，全靠伯樂陳自強推薦給電影人羅維，參演電影《新精武門》後再接拍吳思遠監製電影《蛇形刁手》。成龍走紅後，陳自強挖走成龍自立門戶，助武師出身的他登上大銀幕，演藝創出高峰，兩人合作38年。08年陳自強突然宣佈離開，成龍的事務即由老婆林鳳嬌接手管理，二人關係由密變疏。昨日商台節目播出陳自強錄音訪問，他力數成龍走火入魔，令他無奈引退。
陳自強和成龍結束38年賓主關係後，兩人已甚少孖咇出動。
成龍昨日現身海口活動，並無回應記者提問。
身邊大官富豪多
訪問中，陳自強表示透過秦祥林認識成龍，兩人沒簽過一紙合約，關係如兄弟，他說：「我哋有粥食粥，有飯食飯。佢叫我brother，佢話自己唔識字，叫我幫手睇文件同劇本，幫佢分析。當年佢話『我唔會唔養你，我唔會唔理你』。」
不過融洽關係於6年前畫上句號，陳自強大爆內幕：「慢慢佢紅到有啲走火入魔，已經唔再需要我幫，我又冇乜嘢可以幫到佢，同枱有好多大官，一係大有錢人同yes man，我嘅嘢唔再入耳，好多人想入我個位，有我喺度真係好煩，我知道好多人想take over個位，不如自己瀟灑啲離開，好過俾人話終於被逼出嚟。」
問到結束合作是否可惜？陳自強續說：「真係好可惜，過去37、38年，佢由一句英文唔識，由我拖住佢，監佢上飛機，唔止係佢屋企嘢，仲係全個家庭，由祖名出世，到喺美國搵屋畀嬌姐（林鳳嬌）佢哋住。」陳自強言語間不乏欷歔。雖然成龍剛過去的60大壽，陳自強都畀面出席，陳自強說：「大家冇尷尬，唔係殺父仇人。」陳自強辭任後，即由林鳳嬌處理成龍大小事務，她尤其看重所有數目。
99年成龍爆出吳綺莉懷龍種事件，成龍失言道出：「我犯了天下男人都會犯的錯。」陳自強否認當年曾聯絡吳綺莉講數，他回憶成龍失言：「當時好多軍師，最初用意係想講聖經中有女子被人用石頭掟死嘅古仔，想話好多男人會犯錯，點知佢講咗『天下男人都會犯的錯』，我哋都愕然。」陳自強至今仍自豪捧紅成龍，最近他又助契仔徐君俊開展時裝事業。陳自強說：「對目前生活幾滿意，笑嘅時候多過流眼淚。」
成龍當年憑陳自強介紹拍電影《蛇形刁手》上位。劇照
成龍（左二）炒了成家班的盧惠光（左一）後，兄弟從此反目。
當年成龍以「我犯了天下男人都會犯的錯」來回應吳綺莉懷龍種，亦令陳自強愕然。
否認被嬌姐踢走
記者昨日致電陳自強，他說：「每個人紅咗都難免『走火入魔』，調返轉頭我都會，我哋合作時都有拗撬，但開心時間多，我當年離開真係唔可以進一步幫到佢，佢會有新前途。」陳自強否認被林鳳嬌迫走，他說：「嬌姐同祖名至今對我都好好。」成龍昨日在海口出席電影公司晚宴，未有接受傳媒訪問。
此外，成龍除跟陳自強結束經理人關係，其實早年他先後怒炒跟他15年的成家班成員盧惠光及段偉倫。有指成龍不滿段偉倫經常將他行蹤掛嘴邊，令緋聞多多的成龍非常避忌，02年段偉倫抗旨不肯為成龍做跑腿送衫成炒魷導火線。林鳳嬌取代陳自強揸旗後也叮走盧惠光，盧惠光當年哭訴遣散費不夠10萬。
from:
http://hk.apple.nextmedia ... 140608/18749407
