房祖名同張默先後都因涉毒俾內地公安刑事拘留超過兩個月，但到𠵱家都未上庭受審，聽講公安已經完成蒐證，但遲遲未公審，主要係因為之前要開四中全會，到本週三（5號）至下週二（11號）又要開亞洲太平洋經濟合作會議（APEC），內地官方唔想俾兩位涉毒明星案件搶咗外界焦點，所以要等APEC結束，先慢慢排期審成龍同張國立兩位公子。
據講祖名最快呢個月底應該可以上庭受審，成龍雖然好努力透過各種渠道想救個仔，唔想老婆林鳳嬌日日以淚洗面，但今次單嘢搞到咁大鑊，好多朋友都愛莫能助。嬌姐私下同朋友講，寧願快啲開審，可以早啲知道審判結果。
房祖名因涉及毒品案件仲喺內地刑事拘留緊。
資料圖片
遲到六粒鐘
成龍同張國立兩位老爸都冇因為兩個仔被拘留唔做嘢，前日浙江衞視2015年開年首檔綜藝節目《我看你有戲》喺杭州舉行記者會，兩人以導師身份現身撐場，但雙雙遲到近六粒鐘。成龍一現身就同媒體道歉：「是航班延誤導致我們到杭州的時間遲了，加上路上堵車。抱歉！」兩人全程都冇提個仔涉毒事件，在活動結束後就急急走人，冇落台接受傳媒訪問。
另外，北京警方前晚證實，演員胡某上月16日因吸食毒品被警方依法行政拘留，𠵱家已經放番出嚟。據內地傳媒報導，胡某就係胡兵哥哥胡東，不過佢就喺微博放上近照否認。
撰文：馮仁昭
from:
http://hk.apple.nextmedia ... 141103/18921362
