無線近年爆小生花旦逃亡潮，連親手捧出來的一班巨聲幫都陸續離開，先有劉威煌轉會、近日連羅孝勇都打算不續約，「小巨肺」林欣彤（Mag）本月約滿都有意離開娘家，有週刊爆出她拒續約無線，同時又被唱片公司英皇掟入雪櫃，Mag決心跳槽，她昨日在將軍澳錄影時，直認現階段要諗清楚未來方向。
25歲的Mag於2010年參加歌唱節目《超級巨聲2》彈起，翌年簽約英皇，可是越撈越冇人氣，大前年壓力爆煲患上抑鬱症，近年雖病癒復工，但人氣大不如前，工作量少，有指Mag不滿遭投閒置散決定約滿無線和英皇即向外闖，已有幾間公司密斟中，但她有意加盟周柏豪和連詩雅所屬的Starz People，趁後生再發圍。
羅孝勇已打算不與無線續約，而快將約滿林欣彤也現離心。資料圖片
Starz People老闆鄒世龍（左）成功捧紅周柏豪，有傳林欣彤想過檔。資料圖片
有其他公司接觸
Mag昨日現身時，被追問轉會傳聞，她說：「雜誌所講嘅轉會冇發生過，我𠵱家處於整頓自己時期，我想諗清楚自己想要乜嘢方向，任何決定係冇落實過。」Mag否認有跟Starz People密斟，她卻承認有其他公司接觸，她續說：「密斟就冇，但有啲人會打聽嚇，我想諗清楚自己條路方向先，都有同TVB傾緊。」可是嫌工作量低，不受重用？她說：「又唔係，我發現入咗行，先發現做藝人嘅辛苦，job未必係必然，經理人有努力同我爭取，我都有唔少嘢做，只係我個人比較懶，好少發Instagram同facebook。」Mag表示初出道時為鞏固地位不停爭取曝光，即使現在曝光率少了，但收入仍夠生活，她說：「我收入養到屋企、兩隻狗、阿爸阿媽同細佬，都OK。」
有指Mag除離開無線，同時也會跟英皇結束賓主關係，英皇高層吳雨昨在電話中回應：「Mag份約係好快完，佢經理人係無線，佢簽唔簽番英皇，由無線決定，不過我哋合作咁耐，關係好好。」如Mag離開無線，英皇會加簽她經理人合約嗎？吳雨說：「等無線方面同Mag明確啲先。」
採訪：楊定
from:
http://hk.apple.nextmedia ... 151007/19323174
