周潤發、郭富城同梁家輝早排開工拍新戲《寒戰2》，唔好以為3大影帝喺片場鬥戲角力，氣氛會好緊張，其實啱啱相反，有發哥喺度嘅地方又點會冇歡樂？其實發哥由第一日開工，已經好有戲，而佢喺拍戲以外，就一貫風趣友善。
日前發哥嘅戲份已經完成，難得碰到唔少老拍檔，佢喺自己煞科當日，同其他演員逐個自拍合照，又笑話好似返番去電視台嘅木人巷年代。跟住佢又搭住家輝膊頭，邊跳邊哼小鳳姐嘅金曲《喜氣洋洋》其中一句「齊鼓掌」，心情勁靚。
Fit左好多嘅發哥又同城城交流健身心得，仲一路講一路示範運動姿勢。而影相同行山亦係發哥至愛，佢喺片場同大家分享攝影、行山心得，講講嚇，發哥提議同城城、家輝影張合照，仲提供埋私伙寶麗萊菲林相機，最搞笑係佢用菲林相機影相，相要沖曬好至有得睇，但之後竟然教大家用美圖執相。
梁家輝（右）冇見發哥10幾年，一見面就忍唔住舂個頭埋去。
家輝片場學嘢
家輝話有10幾年冇同發哥合作，以前拍搞笑戲多，合作拍警匪鬥智反而係第一次：「識咗發哥好多年，佢演戲自如又識搞氣氛，要互相學習呢種工作態度；而城城演技真係突飛猛進。」城城就話：「我做足準備去同發哥、家輝合作，過程好過癮，發哥真係好nice體貼，個個都好開心，發嫂成日萬歲。」
撰文：馮仁昭
馮仁昭
from:
http://hk.apple.nextmedia ... 151118/19376783
