現年38歲嘅星野亞希曾經叱吒水著界，幾年前佢嫁畀年輕13載嘅騎師三浦皇成後就一直行衰運，當星野亞希生完囡囡冇耐更爆出老公嘅偷食醜聞，之後當黑嘅星野亞希又捲入網上詐騙，佢被指收錢為購物網站寫blog宣傳，繼而令佢形象破產，連電視台都要封殺佢。
星野亞希近年疊埋心水封胸湊女，不過早前開始鋪路復出，頻頻現身圈中人場合，月前佢就幫名人好友內田新菜嘅潮服品牌nina mew充當Model，今年萬聖節又出席party同一眾女星扮可愛賣萌。
最近出版嘅《週刊文春》報導，星野亞希同26歲嘅三浦皇成結婚4年，多年來鬧出嘅風風雨雨，其實早已影響雙方感情，據知佢哋婚變已係事實，有指分開都係遲早問題。星野亞希雖然被指上圍漏氣，不過38歲依然keep住童顏，近期亦經常蒲頭，明顯係為離後後全面復出率先鋪路。
from:
http://hk.apple.nextmedia ... 151225/19426230
