沈卓盈(沈大師)對上一次戀情都可謂坎坷，「金融才俊」阿Ray性格火爆。兩人拍拖後，沈大師搬咗去禮頓山與男友共賦同居，但兩人不時爭吵，遭鄰居投訴佢哋個單位成日好嘈；2014年與男方去美國外遊，沈大師忽然喺微博曬手指受傷，話唔小心撞到手指尾，撞到骨折要去睇急症，呻整到好痛……
每次嘈完，沈大師都想過同男友分手，但男友都承諾會改，所以最後都係言歸於好。後尾有次，兩人又嘈起上嚟，有指男方失控用網球拍打爛咗大師架Mini坐駕嘅擋風玻璃，雖然口就講話改，但最後大師都係頂佢唔順，去年中決定分手，有報導仲話佢搬返去青衣屋邨添……
分咗手差唔多一年喇，沈大師有新歡未呢？昨晚就影到大師同疑似新男友——眼鏡男(唔知會否又係「金融才俊」喇)一齊去銅鑼灣行街，仲又舔又蹺手添……係就係舔，不過係舔雪條！
睇嚟眼鏡男好怕俾人見到，成程都喺到周圍望，仲同沈大師企開成幾個身位。之後佢哋入咗I See I See到食雪條，仲揀咗個面對牆嘅死角位坐，眼鏡男就叫沈大師坐低先，自己去買雪條。買完歸位，佢哋兩個不時頭貼頭傾偈，沈大師又多次攞手機出嚟自拍，仲同眼鏡男研究下啲相影得靚唔靚o添。沈大師都有喺ig post食雪條嘅相，一條扮舔一條真係食，眼鏡男當然冇出鏡啦。
食咗大約半個鐘之後佢哋就走人喇，離開雪糕店過馬路嘅時候，因為街上好多車，所以眼鏡男就好細心咁蹺住沈大師行。
二人之後就去到渣甸街睇眼鏡，眼鏡男試咗好多款，文青款呀，黑超呀，咩都試一餐。沈大師又冇覺得悶，仲同佢試埋一份o添，佢哋又互相俾意見對方。試咗半個鐘之後走人，往Time Square方向，沿途經過幾間眼鏡鋪嘅時候，佢哋都會停低睇一陣，沈大師就喺側邊手指指俾意見。
每當去到人多嘅地方佢哋都變得充滿戒心，企到成幾丈遠，不過一要過馬路或者去到窄路嘅時候，眼鏡男好幾次都會攬住沈大師行，真係體貼。最後佢哋去到利舞臺附近一間鋪頭睇護膚品，再行入Time Square，繼續行喇…
from:
http://hk.apple.nextmedia ... 160306/19518614
