韓劇《太陽的後裔》今晚又播出新一集，大家記得坐定定煲劇喇！早前有網民po文話畀女友威逼「被追劇」，各位巴打唔使灰喎，「被追劇」就梗o架喇，不過至少仲有得揀，可以推薦返同《太陽的後裔》打對台，由Rain擔正嘅搞笑劇《回來吧大叔》畀絲打們，應該會睇得幾開心！三個粉絲出街做咗實驗，畀港男港女睇《太陽的後裔》和《回來吧大叔》兩劇嘅精華片段，究竟巴絲打睇韓劇有咩大不同，各自會buy邊套？
先睇Rain喺《回來吧大叔》嘅騷肌片段。
港女睇到嘩嘩聲，勁開心。
JW都話睇到出曬汗。
《回來吧大叔》可謂女性恩物，因為第二集Rain幾乎全裸騷肌，港女觀眾睇到嘩嘩聲，女歌手JW（王灝兒）直頭話睇到出曬汗，吳君如仲話唔夠喉，「我以為最尾Rain會拉落啲，仲以為係三級韓劇添！」當港女睇到紅都臉曬之時，港男一樣有反應，港男Tony話好羨慕Rain排朱古力，「好葡萄囉！」毛記電視東方昇都睇到笑，問：「係咪應該有生理反應？撳返平少少先！」Rain去到咁盡，不論男女都投佢一票，雖然有人話唔會因為睇少少而追劇，但係都有4男3女話有興趣追《回來吧大叔》。
君如話唔夠喉，以為Rain會再拉落啲。
東方昇睇到笑，問係咪要有反應，要撳返平少少。
港男就話好葡萄Rain有排朱古力！
至於人氣爆登嘅《太陽的後裔》似乎冧到港女多過港男，港女一見男主角宋仲基就大讚「好靚仔呀」、「好型呀」、「好sweet呀」，仲讚佢「真係好識媾女！」。不過，大部份港男都唔鍾意情情塔塔嘅劇情，羨慕Rain排朱古力嘅Tony話劇情好離地，「拍走電話嗰段唔make sense！」坐佢隔離嘅CC話，「咁不如去睇馬戲！」JW都認同劇情喺現實中唔會發生，「男女主角對望嗰啲畫面，香港男仔都唔會望住你o架！」不過，JW一樣睇得好冧，仲話點都會追《太陽的後裔》。
至於《太陽的後裔》，呢幕宋仲基打走電話又接得返咁經典，港女睇到都嗌型。
又話佢好靚仔，好識媾女
港男就唔受呢套，話錫得好突然，劇情離地。
至於《太陽的後裔》多幕KISS戲，女仔都睇得好專心，甚至連韓國女仔Sally都話好妒忌佢哋。但係，原來男仔睇劇完全唔同！由於睇片時只係睇一小段，無前文後理，其中港男Alan就分析劇情話，「錫就係道歉o架喇？」韓男Woo仲即時講廣東話：「講大話！」佢話自己當兵嗰兩年都無見過一個女仔！另一港男Joeson仲無奈咁話，「我會諗...點解要畀條片我睇囉！」結果，宋仲基多數冧到女，有4女2男撐《太陽的後裔》。
韓仔Woo仲大爆劇情係講大話，因為佢當兵嗰陣根本唔會見到女仔。
男仔睇KISS戲都無乜反應，女仔就睇得好enjoy。
總結，港男鍾意《回來吧大叔》多啲，港女就會追《太陽的後裔》。
主持：動主播阿仙、《三個粉絲》元祖級主持Cemon
攝影：馮峰陳慧安沈建程
鳴謝：119韓國站(深水埗分店)、BBQ Military(荃灣店)
《回來吧大叔》片段由Viu提供：
https://goo.gl/dkdQg3
《太陽的後裔》片段由Viu提供：
https://goo.gl/RixIDX
【三個粉絲追韓劇】
http://hk.apple.nextmedia ... nimation/kfans/
from:
http://hk.apple.nextmedia ... 160407/19560301
