郭富城喺今年3月被《蘋果》發現同方媛（Moka）秘密入紙，4月低調喺半島酒店擺酒拉埋天窗。城城同Moka呢段感情公諸於世，係由前年12月一張車廂拖手相開始，仲sweet爆留言話「這樣開車要慢一點！」公開認定城嫂地位。
當時戀情可能啱啱萌芽，城城對女友好肉緊，有傳媒喺佢哋認拍拖前，已經見到城城開車送Moka到機場，由於Moka當時未習慣面對記者，就顯得有啲尷尬，城城就出面為女友開路入機場。
不過兩人感情越親密，遇見傳媒時就越大方。好似上年9月，城城開完演唱會後翌日，就孖女友喺銅鑼灣食飯，離開時見到記者，城城淡定認同女友食飯，反而Moka就醒目拉開距離，而城城就體貼咁邀請女友上車。
再到咗上年11月，城城揸車送Moka去養和醫院，Moka就輕輕挨住城城肩膀行入登記處。最sweet嘅一次就要數到上月母親節，城城同Moka結咗婚一個月，兩人就喺中環置地行街，Moka蹺實城城揀禮物送俾媽咪。
from:
http://hk.apple.nextmedia ... 170607/20047365
