笑言與霆鋒「唔熟」的四哥謝賢，已屆八旬，最近獲子送贈8,500萬淺水灣道怡峰向海單位，兩層合共近二千呎。約9月左右就可以入伙。新居好大，但住嘅得四哥一個。
大吉利是話自己「好快俾番(間屋)」霆鋒嘅四哥，百無禁忌，在昨日出版的周刊訪問中，不時話自己「嗰頭近」，所以依家乜嘢都會做，除咗壞事。
唔怕死。四哥話嘅。遲早都去，有乜嘢好驚？都係四哥話嘅。飲食隨己好惡又唔戒口，Body check都唔做。之前拍《賭城群英會》撞車致肋骨骨裂，四哥在訪問中稱，依家背脊仍然會痛，但佢又唔去睇醫生。「我都差唔多啦！」又係呢句。
一個人住，工人煮完飯就走。拍拖十年又細佢49年嘅女友CoCo亦都唔係成日見，四哥嘅理由係，見得多唔好。
但家陣四哥覺得自己開始有啲失憶，啱啱擺低嘅嘢轉頭渾忘，搵都搵唔番。於是四哥又話，自己都係「嗰頭近」。
間屋咁大又一個人住，這位佻皮長者又打趣謂可能有晚「趴低都冇人知」。不過四哥都係冇句真。佢平時四圍走冇時停，周不時行山，或相約竹戰。成日郁，延年益壽。
最大心願，四哥話就係想見到仔女同孫兒好。仲話自己會繼續拍劇，不過係大陸嘅網劇。
你話死唔死！四哥都北上搵人仔，香港觀眾其實有冇諗過可能未到2046已經冇本地製作欣賞？
from:
http://hk.apple.nextmedia ... 170625/20068216
