無綫同內地愛奇藝合拍嘅劇集《踩過界》，第一季就嚟做完，劇中嘅感情錯綜複雜，盲俠(王浩信)、癲姐(蔡思貝)、Never(李佳芯)、Gogo(張振朗)呢段四角關係，真係斬不斷理還亂。
李佳芯除咗同張振朗會有女上男下嘅床戲之外，先前佢都有講過會同盲俠有床戲㗎啦，而網上就有第二季嘅預告片，今次真係機會嚟喇，呢段分半鐘嘅預告片，就係盲俠同Never嘅火辣床戲。
預告片入面，首先就見到赤裸上身嘅盲俠，披住條毛巾，相信佢就係準備去洗白白，此時Never就入咗盲俠間房，就好似有好多情深說話未曾講咁伏咗係盲俠胸口，仲問盲俠點解唔俾人接近佢嘅內心世界，盲俠當時就欲拒還迎咁推開咗Never，Never就主動咁咀盲俠。
見盲俠冇乜反應，Never惟有講唔好意思就行開，但盲俠就一個反手拉返Never埋身，主動咁咀佢，跟住兩個就一齊撻咗落床喇。
之後點就唔使多講，但重點其實係當佢哋纏綿遊戲緊嘅時候，床下底原來仲有人，嗰個人就係一直明戀盲俠嘅癲姐，當見到自己所愛嘅人同另一個女人纏綿，內心嗰種痛苦大家都可以想像得到。預告片就見到唔敢出聲嘅癲姐，傷心得含淚掩嘴，真係聞者傷心，聽者流淚，感同身受。但最吊鬼之處，聽力異於常人嘅盲俠，冇可能唔知道間房仲有第三個人喺度，除非癲姐傷心到心跳都停埋。
from:
http://hk.apple.nextmedia ... 170731/20106872
