孫耀威同葉芷如之前合作校園劇《我們的6E班》。
孫耀威（老孫）同葉芷如合作嘅電影《我們的6E班》，以青春校園帶出香港種族問題，兩人飾演老師，老孫仲以「港版麻辣教師」身份出現。早前佢哋喺尖沙嘴接受訪問，老孫話：「呢間學校有唔同種族，引發好多矛盾。仲有校園毒品、黑社會等問題。」佢話喺學校夥拍葉芷如呢位新老師拯救班後生仔。
葉芷如自言曾是「問題少女」，讀書時期呃父母唔去學琴。
手指公骨裂
有場戲講老孫救學生，搞到手指公骨爆裂，老婆陳美詩睇到喊，孫耀威話：「佢睇到喊，都心痛，我就肉痛。」
大學畢業嘅老孫曾經都係問題學生，小學開始打交，佢笑話：「成績好，唔代表係乖寶寶，我喺大學讀電腦工程系，個個好宅，但我好鍾意玩、留長髮、夾band，好細個已經去蘭桂坊。」外表乖乖女嘅葉芷如，細個俾父母安排學小提琴：「小一開始，每日練3個鐘，唔知為乜。後來我呃媽咪話要考公開試，冇時間練琴，話考上大學先再學。話去做運動，其實係去學跆拳道學功夫，冇再學琴，後來媽咪知道咗。」
場地提供：美麗華酒店
撰文：馮仁昭
from:
http://hk.apple.nextmedia ... 170920/20157957
